“Komandamıza yeni futbolçuların cəlb olunması istiqamətində işlər gedir“.
Bu sözləri Sportinfo.az-a açıqlamasında “Qəbələ”nin baş meneceri Zaur Əzizov deyib.
Bilindiyi kimi, əyalət klubunda kütləvi ayrılıq baş verib. Premyer Liqanın yeganə bölgə təmsilçisi rəsmi saytı vasitəsilə 9 futbolçu ilə vidalaşdığını bəyan edib.
Bunlar Cavid Hüseynov, Merab Qiqauri, Nikolas Raysel, Ülvi İsgəndərov, Yusif Nəbiyev, Sadiq Quliyev, Roman Hüseynov, Faiq Hacıyev və Ceyms Adeniyidir.
Adıçəkilən oyunçuların 2020/21 mövsümünün ardından başa çatan müqavilələrinin uzadılmamasına qərar verilib.
Z.Əzizov gedənlərin yerini klubun akademiyasının yetirmələri və legionerlərlə dolduracaqlarını bildirib: “Akademiyadan çıxan gənclər daim diqqətimizdədir.
Onların bir neçəsi ötən mövsümdən əsas komanda ilə məşqə və oyunllara çıxıb. Gələn mövsüm də belə olacaq. Əlbəttə, legioner də gətirəcəyik. Minimum 6 nəfər.
Maraq dairəmizdə olan legionerlər var. Sadəcə, AFFA-nın klubumuza ayıracağı büdcəni gözləyirik. Hələlik yardım paketinin nə qədər təşkil edəcəyi bilinmir».