IV İslam Həmrəyliyi Oyunlarının idmançı səfirləri gənc idmançılar və idmana həvəsli olan gənclərə master-klasslar keçəcəklər. Bu barədə Sportinfo.az-a "Baku 2017"nin Əməliyyat Komitəsindən bildiriblər. "Domestic Grassroots” proqramı çərçivəsində təşkil olunacaq master-klasslarda "Bakı 2017"nin rəsmi facebook səhifəsindəki müsabiqələrdə qalib olan şəxslər, idman növü üzrə məşğul olan gənc idmançılar və pərəstişkarlar iştirak edəcəklər.
Cüdo üzrə master-klass martın 13-də "Neftçi" klubunun təlim bazasında Olimpiya mükafatçıları Rüstəm Orucov və Elmar Qasımov tərəfindən təşkil olunacaq. Bir gün sonra Olimpiya Güləş Mərkəzində baş tutacaq güləş üzrə master-klassda isə Olimpiya mükafatçısı Hacı Əliyev iştirak edəcək.
Martın 15-də "Bayıl Arena"da reallaşacaq futbol üzrə master-klass isə Azərbaycan milli komandasının üzvü Ruslan Abışov tərəfindən keçiriləcək. Master-klassların məqsədi idmançı səfirlər tərəfindən yeniyetmə və gənc idmançıları həvəsləndirərək onlara idman karyeralarında dəstək verməkdi.
