Penaltilər seriyası "Ayntraxt"ı Avroliqanın qalibi etdi - VİDEO

19 May 2022 02:00 Avropa Liqası 2 856
Penaltilər seriyası  "Ayntraxt"ı Avroliqanın qalibi etdi - VİDEO

Avropa Liqasında 2021/2022 mövsümünün qalibi bəlli olub.

Sportinfo.az xəbər verir ki, turnirin final oyununda "Reyncers"i məğlub edən "Ayntraxt" titula sahib çıxıb.

İspaniyanın Sevilya şəhərindəki "Ramon Sançes Pisxuan" stadionunda oynanılan qarşılaşmanın əsas vaxtı 1:1 hesablı heç-heçə ilə başa çatıb.

İlk qolu 57-ci dəqiqədə Qlazqo təmsilçisi vurub. Rəqib müdafiəçinin səhvindən yararlanan Co Aribo komandasını önə keçirib.

Lakin "Reyncers"in üstünlüyü çox çəkməyib. 69-cu dəqiqədə Rafael Borre tarazlığı bərpa edib.

Əlavə vaxtda hesab dəyişmədiyindən qalibi müəyyənləşdirmək üçün penalti zərbələrindən istifadə olunub. Burada daha dəqiq oynayan "Ayntraxt" Avropa Liqasının qalibi olub.

11 metrlik cərimə zərbələri zamanı Almaniya təmsilçisindən Kristofer Lents, Aydin Xrustiç, Dayçi Kamada, Filip Kostiç və Rafael Borre, Şotlandiya klubundan isə Ceyms Tavernye, Stiven Devis, Skott Arfild və Kemar Ruf hədəfdən yayınmayıblar.

Yeganə qeyri-dəqiq penaltinin müəllifi Aaron Remsi olub.

18 may

"Ayntraxt" (Almaniya) - "Reyncers" (Şotlandiya) - 1:1 (ƏLAVƏ VAXTDA - 0:0, PENALTİLƏRLƏ - 5:4)

Qollar: Rafael Borre, 69 - Co Aribo, 57

Baş hakim: Slavko Vinçiç (Sloveniya)

Sevilya, "Ramon Sançes Pisxuan" stadionu.

Digər Xəbərlər
Xəbər Lenti