Minifutbol üzrə Azərbaycan millisi Bosniya və Herseqovinanın paytaxtı Sarayevoda keçirilən Avropa çempionatında Bolqarıstan yığmasına 3:1 hesabı ilə qalib gələrək 1/4 finala yüksəlib.
Sportinfo TV-nin aparıcı eksperti Elçin Cəfərov millimizin möhtəşəm çıxışı haqda danışıb. Deyib ki, federasiya rəhbərliyindən məşqçilərinə, məşqçisindən futbolçularına qədər hər birini ayrı-ayrılıqda təbrik edirik. Minifutbol Federasiyasının prezidenti Orxan Məmmədovu, federasiyanın icraçı vitse-prezidenti Taleh Nəsibovun gördüyü işlər təqdirəlayiqdir.
Millimiz qitə birinciliyinə mükəmməl şəkildə hazırlaşıb. Taktiki, mental olaraq buna çox inanıblar: "İki fərqli milli izlədik. Qrup mərhələsi və ondan sonrakı period. Məşqçi işinin yüksək səviyyədə icrasının şahidi olduq. Elşad Quliyev və məşqçilər korpusuna yağlı "5" düşür. Yəni, bu hələ potensialını tam göstərməyən komandamızdır. Çünki rəqiblər də komandamızı diqqətlə izləyirlər. İnşallah, yenidən çempion olaraq Vətənə dönərik. Amma nəticə necə olursa olsun, minifutbolçularımızın çıxışı, işə yanaşma tərzini alqışlamaq lazımdır".
