"Bu il "Sabah"ın ili olacaq, möhtəşəm çıxış edəcəyik" - İDDİALI TƏMKİN

7 Avqust 10:52 Sabah 745
"Bu il "Sabah"ın ili olacaq, möhtəşəm çıxış edəcəyik" - İDDİALI TƏMKİN

Millinin və "Sabah"ın müdafiəçisi Təmkin Xəlilzadə Sportinfo.az-ın suallarını cavablandırıb:

- Yeni mövsümdə «Sabah»dan nə gözləyirsiz? Sizcə, komanda uğur qazana biləcəkmi?
- Gözləntilərim böyükdür. Qəbələdə keçirdiyimiz yoxlama oyunlarında öz sözümüzü dedik. Əminəm ki, gələn çempionatda layiq olduğumuz yeri əldə edəcəyik.

- Yeni baş məşqçi Visente Qomesin gəlişindən sonra komandada nə dəyişib?
- Yaxşı komandamız, yaxşı baş məşqçimiz var. İspaniyalı məşqçimiz çox ünsiyyətcildir. Eyni zamanda, tələbkardır. İlk gündən hiss olunur ki, yüksək futbol biliyinə malikdir. İndi komandada dəyişiklik gözlə görünəcək dərəcədə çoxdur. Hamımız iddialıyıq. Bu il bizim üçün möhtəşəm olacaq.

- Sizdə bu nikbinliyi nə yaradıb?
- Qəbələdə 3 oyun oynadıq. İkisində böyük hesabla qalib gəldik. Özüm də iki qol vurdum, bir də məhsuldar ötürmə verdim. İstər-istəməz nikbinlik var. İnanram ki, belə gözəl nəticələri Premyer Liqa başlayanda da göstərəcəyik.

- Bir müddət əvvəl klubdan ayrılmaq istədiyiniz barədə xəbərlər yayılmıışdı. «Keşlə», «Zirə» və digər variantlar barədə danışılırdı.
- «Sabah»dan ayrılmaq fikrim olmayıb. Hələlik müqaviləm davam edir. Mən də bu təklifləri mediadan oxuyurdum (gülür).

- İndi «Sabah»da tamamilə rahat olduğunuzu və sabaha ümidlə baxdığınızı deyə bilərikmi?
- Əlbəttə! Ümidli deyiləm, əminəm. Bu il «Sabah»ın ili olacaq. Yenə deyirəm, biz bu il möhtəşəm olacağıq.

- Sizcə, ötən mövsüm komandanın uğurlu çıxış etməsinə nə mane oldu?
- Karantin (gülür). Düşünürəm ki, çempionat axıra kimi keçirilsəydi, biz Avroliqaya vəsiqə də qazanacaqdıq. Amma pandemiyaya görə bu, bizə qismət olmadı. Bilirsiz, «Sabah» heyət baxımından güclüdür. Millinin aparıcı futbolçular məhz bu komandada oynayıır.

P.S. Təmkin sonda «uzun zamandır heç kimə müsahibə vermirəm. 27 yaşımın ilk müsahibəsini sizə verdim» dedi.

Digər Xəbərlər
Xəbər Lenti
22 Sentyabr 23:20 Qurban Qurbanova çatdı
22 Sentyabr 22:20 Vidalla müqavilə imzaladı
21 Sentyabr 22:00 Mendi transferində tamam