Bu gün "Sabah" Çempionlar Liqasının Liqa mərhələsində 4-cü tur oyununa çıxacaq.
Valdas Dambrauskasın komandası Norveçdə "Vikinq"lə qarşılaşacaq.
"Viking Stadium"da keçiriləcək görüş Bakı vaxtı ilə saat 00:00-da başlayacaq.
Hazırda turnir cədvəlində "Sabah" 3 xalla 25-ci, "Vikinq" isə 1 xalla 33-cüdür.
Norveç təmsilçisinin oyununda diqqət çəkən müəyyən problemlər var.
Ən vacib məsələ müdafiə xəttinin sabitliyidir. «Vikinq»in yüksək pressinq zamanı müdafiə xəttini irəli çəkməsi arxa zonalarda boşluqlar yaradır.
Xüsusilə müdafiə və yarımmüdafiə xətləri arasındakı məsafə artdıqda rəqib komanda bu zonalardan istifadə edə bilər.
«Sabah» məhz bu sahələrə diqqət yetirməlidir. Topu qazandıqdan sonra ilk və ikinci ötürmələrin sürətli olması, cinahlara vaxtında çıxış və hücumçuların müdafiə arxasına hərəkətləri ev sahiblərinə qarşı effektiv ola bilər.
Burada vacib məqam yalnız sürətli hücum etmək deyil, hücumun düzgün vaxtda başladılmasıdır. «Vikinq» irəli çıxdıqda onun müdafiə xəttinin arxasında yaranan boşluqlar «Sabah»ın hücumçuları üçün əlverişli imkanlar yarada bilər.
İlk baxışdan Norveçdə səfər oyunu və «Vikinq»in ev üstünlüyü «Sabah» üçün çətin sınaq təsiri bağışlaya bilər. Ancaq taktiki baxımdan bu rəqibin müəyyən xüsusiyyətləri Azərbaycan təmsilçisinin oyun modelinə uyğun gəlir.
Valdas Dambrauskasın komandası yalnız müdafiə olunmağa və rəqibin səhvlərini gözləməyə üstünlük vermir.
«Sabah» topa nəzarət etməyə, arxadan qısa ötürmələrlə hücuma başlamağa, yarımmüdafiədə kombinasiyalar qurmağa və cinahlarda dinamik hücumlar yaratmağa çalışır.
Komandanın əsas üstünlüklərindən biri oyun fəlsəfəsini rəqibin adına görə tamamilə dəyişməməsidir.
«Mançester Yunayted»lə səfər qarşılaşmasında da «Sabah» yüksək pressinq tətbiq etməyə və öz oyununu göstərməyə çalışmışdı. Daha sonra «Slaviya Praqa» üzərində 2:0 hesablı qələbə bu yanaşmanın Avropa səviyyəsində nəticə verə biləcəyini göstərdi.
«Vikinq»in irəli çıxan müdafiə xətti «Sabah»ın hücumçuları üçün əlavə imkanlar yarada bilər. Xüsusilə Coy-Lens Mikels və Kahim Parrisin boş zonalara hərəkətləri vacib olacaq.
SPORTİNFO.AZ
