.jpg)
Premyer Liqanın avrokuboklara vəsiqə qazanmağa iddialı komandalarından olan “Qəbələ” də qış hazırlığına başlayıb.
Bölgə təmsilçisi yanvarın 4-ü səhər saatlarında vətəni tərk edərək Bakı-İstanbul-Antalya reysi ilə Türkiyəyə yola düşüb.
Baş məşqçi Elmar Baxşıyev Bakıdan qardaş ölkənin turist şəhərinə özü ilə 20 futbolçu aparıb. Hamısı yerli oyunçular.
“Qəbələ”nin 6 legioneri komandaya yanvarın 5-də qoşulacaq.
Baxşıyevin üzünü güldürən əsas məqam kollektivdə zədəli və xəstə futbolçuların olmamasıdır. Bu isə o deməkdir ki, komanda təlim-məşq toplanışını tam şəkildə keçə biləcək.
Bölgə təmsilçisi çempionatın ikinci yarısına mövsümə başladığı heyətlə davam edəcək. Baş məşqçi heyətin qorunub saxlanılmasında maraqlıdır.
Eyni zamanda, komandasının 1-2 futbolçu ilə güclənməsini də istəyir. Lakin bunun üçün büdcədə pul qalmayıb.
“Qəbələ”nin Antalya toplanışı yanvarın 4-dən 17-dək nəzərdə tutulub. “Qırmızı-qaralar” bu müddətdə iki yoldaşlıq görüşü keçirəcək.
Yanvarın 12-dəki rəqibin adı “Sepsi”dirsə (Rumıniya), ayın 16-dakı sınaqda meydanın qarşı tərəfində “Teplitse”nin (Çexiya) futbolçuları dayanacaq.
HƏBİB / SPORTİNFO.AZ
