“Fikirləşdiyimiz kimi, oyun ağır keçdi. Uduzduğumuz zaman da komandamdan razı qalmışam".
Sportinfo.az xəbər verir ki, bunu "Qəbələ"nin baş məşqçisi Elmar Baxşıyev "Zirə"yə 3:0 hesabı ilə qalib gəldikləri Azərbaycan Premyer Liqasının XXV tur oyunundan sonra deyib.
42 yaşlı mütəxəssis rəqibin yaxşı kollektiv olduğunu bildirib: "Rəşad Sadıqov güclü komanda formalaşdırıb. “Qəbələ” mövsüm ərzində iddiasını meydanda göstərib. Mövsümboyu necə idiksə, bu gün də futbolçular verilən tapşırığı yerinə yetirməyə çalışdılar".
Baxşıyev sona 3 tur qalsa da, hələ də avrokuboklara vəsiqə barədə düşünmədiklərini söyləyib: “Qələbə xoşdur. Amma dayanmaq fikrimiz yoxdur. Mövsümü layiqincə başa vurmağa çalışacağıq. Nə mən, nə də komandam avrokubok barədə düşünür. İndi yalnız “Neftçi” ilə qarşıdakı görüşü fikirləşirik”.
