"Mən olsam, daha da pis ola bilərdi" - Kapitandan səmimi etiraf

11 Sentyabr 11:40 Müsahibə 608
"Mən olsam, daha da pis ola bilərdi" - Kapitandan səmimi etiraf

"Qəbələ"nin kapitanı Asif Məmmədov Sportinfo.az-a müsahibə verib.

Koronavirusa yoluxması səbəbindən arxada qalan iki turu komandasına kömək edə bilməyən yarımmüdafiəşi hazırkı durumu və komandasının çıxışı barədə danışıb.

- Asif, sağlamlığınla bağlı bir müddət komandanın yanında ola bilmədin. İndi özünü necə hiss edirsən?

- Şükür yaxşıyam. Ciddi narahatlığım olmadı. Sadəcə testin cavabı pozitiv çıxdığı üçün bəlli müddət gözləmək məcburiyyətində qaldım. Ötən ayın sonları məşqlərə başlamışam. Hər şey yaxşıdır.

- Milli komandalara görə yaranmış fasilə bu gün bitir. 3 həftəlik ara komandaya necə təsir edə bilər?

- Çempionat dayanmasa daha yaxşı olardı. Çünki komanda sürət yığmışdı. Həmişə biz sürət yığan vaxt fasilə yaranır (gülür).

- Ziyanı olacağından narahatsan?

- Özümüzü yaxşı hiss etdiyimiz vaxtdı. Nəticələr yaxşıdır. Belə məqamda fasilənin olması istər-istəməz təsir edir. Amma xeyri də ola bilər. Bəzi boşluqlar vardı. Üzərində çalışıb, onları düzəltmişik. İnanıram ki, öncəki turlar olduğu kimi bu turda da yaxşı oyun keçirə biləcəyik.

- "Qəbələ" ilk 2 tura 4 xal qazanmağı bacardı. Belə startı necə qiymətləndirirsən?

- İlk turlarda çempionata pis başlamamışıq. Uşaqlar yaxşı çıxış etdilər.

- Sən olsan nəticə daha yaxşı ola bilərdimi?

- Bəlkə də mən olsam, daha da pis ola bilərdi.

- Amma yaxşı da ola bilərdi...

- Ola bilər. Amma belə pis deyil də. Çünki son çempion "Neftçi"dən səfərdə xal almışıq. Evdə də "Keşlə"ni məğlub etmişik.

- Deyəsən, belə start özün üçün də gözlənilməz olub...

- Açığı, əvvəlcədən 4 xal təklif olunsaydı, məncə, 100 % razı olardıq.

- Bu gün "Sabah"la qarşılaşacaqsınız. Səncə, uğurlu çıxışı davam etdirmək mümkün olacaq?

- İnşallah. Məqsədimiz odur. Necə başlamışıqsa, elə də davam etdirmək istəyirik.

Xanoğlan İmanov

Digər Xəbərlər
Xəbər Lenti