21 yaşadək futbolçulardan ibarət Azərbaycan millisi Portuqaliyaya uduzdu.

AÇ-2027-nin seçmə mərhələsi çərçivəsində 8-ci kilometr stadionunda baş tutan qarşılaşmada portəgizlər 6 ay öncə olduğu kimi, yenə darmadağına sevindi.

Sentyabrın 5-də tablodakı rəqəmlər 5:0-ı əks etdirmişdisə, bu dəfə 4:0 oldu.

Yığmamızın baş məşqçisi Rəşad Eyubov oyundan sonra təşkil olunan brifinqdə matçla bağlı fikirlərini səsləndirib, ardınca jurnalistlərin suallarını cavablandırıb:

“Oyuna köklənmə yüksək səviyyədə idi. İlk hissədəki mübarizəyə görə uşaqlara təşəkkür edirəm. İkinci yarıda nəzarəti itirdik, bir az rahatlaşdıq. Ən böyük problemimiz olan standart vəziyyətlərdən 3 qol buraxdıq”.

- Milli Portuqaliyada yaxşı oynamışdı, yoxsa evdə?

- Uduzursansa, yaxşı oyundan danışmaq olmaz. Uduzmuşuqsa, deməli, pis oynamışıq.

- Sentyabrda Portuqaliyaya 0:5 uduzmuşduq. İndi isə 0:4 oldu. Buna inkişaf demək olar?

- Neqativ inkişaf olmur.

- İlk hissədə qol buraxmadığınız rəqibdən fasilədən sonra 4 top buraxmağın səbəbini nə ilə izah edə bilərsiniz?

- Bu, ilk növbədə intensivliklə bağlıdır. Təsəvvür edin, bir həftə əvvəl bizim bəzi futbolçular Əvəzedicilər Liqasında, yaxud I Liqada mübarizə aparıb, Portuqaliyanın bəzi futbolçuları Çempionlar Liqasında oynayıb. Ona görə də gücümüz yalnız bir hissə üçün yetərli oldu. İkinci yarıda intensivlik baxımından rəqibdən geri qalırdıq.

- Ara-sıra əsas milliyə cəlb olunan futbolçulardan yəqin ki, daha artığını gözləyirdiniz.

- Fiziki hazırlıq baxımından futbolçuları ən optimal vəziyyətə çatdırmağa çalışmışdıq. Görünür, bu, yetərli olmadı.

- Rəqib həmkarının yağışlı havanın oyunlarına təsir etmədiyini bildirdi. Siz necə düşünürsünüz?

- Heç bir problem yoxdur. Şərtlər hər iki komanda üçün eyni idi.

- İlk hissədən razı qaldığınızı dediniz. Ancaq ilk hissədə komanda əsasən müdafiə olunurdu, hücum planında aktivlik yox idi.

- Sən qol buraxmırsansa, oyun 0:0 qurtarır və 1 xal qazanırsan.

- Martın 31-də Bolqarıstanla səfər qarşılaşması baş tutacaq. Nəyə ümid edirsiniz?

- Bu gün axşam Portuqaliya ilə matçı təhlil edəcəyik. Səhvlərimizi görəcək, sabahdan etibarən onları düzəltmək yolunda çalışacağıq. Nəticə barədə proqnoz verməyi xoşlamıram. Bizim işimiz komandanı oyuna maksimum hazırlamaqdır. Yüksək nəticə gözləyirik.

HƏBİB