Xəbər verdiyimiz kimi, "Karvan-Yevlax" baş məşqçisi Azər Həşimovla rəsmi qaydada yollarını ayırmamış Füzuli Məmmədovu eyni posta gətirib.
Sportinfo.az xəbər verir ki, Premyer Liqanın hesabat turunda keçirilən "Qarabağ"la oyuna da komandanı Füzuli Məmmədov çıxarıb.
Məsələ ilə bağlı Peşəkar Futbol Liqasından teleqraf-ın sorğusuna cavab olaraq bildirilib ki, "Karvan-Yevlax"da baş məşqçi dəyişikliyi ilə bağlı quruma hazırda rəsmi məlumat yoxdur.
PFL-in mətbuat xidmətinin rəhbəri Sənan Absullayevin sözlərinə görə, klub PFL-ə sadəcə komandanı təsnifat turuna Füzuli Məmmədovun çıxaracağını bildirib və onun mətbuat konfransında təmsil olunmasını xahiş edib.
Qurum rəsmisi bildirib ki, Azərbaycan Premyer Liqasının XIII turunda baş tutan “Qarabağ” - “Karvan-Yevlax” matçına qonaq komanda oyuna rəsmi protokolda Azər Həşimovun rəhbərliyi altında çıxıb:
“Yevlax təmsilçisi baş məşqçi Azər Həşimov və onun köməkçiləri ilə bağlı bizə hər hansı yeni bir məlumat ilə müraciət etməyib. Sadəcə, məşqçilər korpusuna yeni məşqçilər əlavə etməklə bağlı müraciət var.
Füzuli Məmmədov da baş məşqçinin köməkçisi kimi qeydiyyatdan keçib. Biz bu məsələni diqqətdə saxlayacağıq”.
