Bir ilə yaxındur futbolsuz qalan Təmkin Xəlilzadə karyerasını ölkə xaricində davam etdirə bilərmiş.
30 yaşlı yarımmüdafiəçi Sportinfo.az-a açıqlamasında Qazaxıstan klubundan təklif aldığını, lakin maliyyə şərtlərində fikir ayrılığının yarandığını gizlətməyib.
Az maaşa legioner həyatı yaşamaq istəməyən sol cinah müdafiəçisi həmin klubun adını saytımıza söyləyib:
“Qazaxıstanın “Kaysar” klubundan təklif almışdım. Solaxay müdafiəçi axtarırdılar və mənim haqqımda maraqlanmışdılar.
Əlaqə saxladılar, ümumi söhbətləri etdik, müəyyən razılığımız oldu. İş maaş məsələsinə gələndə fikir ayrılığı yarandı.
Premyer Liqamızın oyunlarını izləyirəm. Şükürlər olsun ki, çempionatımızda oynamaq üçün kifayət qədər gücüm var. Görək gələcəkdə necə olacaq”.
Ötən ilin dekabrında “Zirə”dən ayrılandan sonra futboldan uzaq düşən Təmkin Xəlilzadə xeyli vaxtdır minifutbol oynayır. 30 yaşlı futbolçu hazırda Azərbaycan minifutbol millisinin heyətində Türkiyədə təlim-məşq toplanışındadır.
HƏBİB
