.jpg)
“Hall Siti” Azərbaycan millisinin hücumçusu Mahir Emreli ilə təmasa keçib.
Sportinfo.az Böyük Britaniya mətbuatına istinadən xəbər verir ki, Çempionşip təmsilçisi 27 yaşlı futbolçunun keçidi sayəsində hücum xəttini gücləndirəcəyini düşünür.
“Hall Siti”ni Emreliyə yaxınlaşdıran iki əsas məqamdan biri komandanın yeni baş məşqçisi Sergej Yakiroviçin daha əvvəl hücumçumuzla Zaqreb “Dinamo”sunda birgə çalışması, digəri isə oyunçunun azad agent statusu daşımasıdır.
Yakiroviç şəxsən rəhbərlikdən həmyerlimizi sərəncamında görməyi tələb edib. Ancaq onun transfer siyahısında başqa hücumçular da var.
Əgər Emreli qısa müddətdə cavab verməsə, o zaman ingilislər siyahıdakı digər variantları nəzərdən keçirməyə başlayacaq.
Mahir Emreli geridə qalan mövsümün sonunda Almaniyanın Bundesliqa-2 klubu “Nürnberq”dən ayrılıb.
