Avroliqanın qrup mərhələsində "Qarabağ"ın rəqibi APOEL artıq son turun nəticələrindən asılı olmayaraq 1/16 finala vəsiqəni təmin etdi.
Sportinfo.az xəbər verir ki, Kipr klubunun baş məşqçisi Tomas Doll "Düdelanj"la səfər oyunundan (0:2) sonra tapşırığın öhdəsindən vaxtından əvvəl gəldikləri üçün şad olduğunu deyib.
Təcrübəli alman mütəxəssis komandasının qrupdan çıxmağa layiq olduğunu bildirib:
“Əlbəttə, sevinirəm. Çünki növbəti mərhələyə çıxmaq bizim tam haqqımız idi. Vacib olan oyunlarda xal qazandıq. Qrupdakı potensial və real rəqibimiz "Qarabağ"a heç bir oyunda uduzmadıq. Bakıdan 1 xalla qayıtmağımız və Kiprdəki qələbə bizim 1/16 finala yolumuzu açmış oldu. Hərçənd qrup mərhələsinə gözlənilməz məğlubiyyətlə başlamışdıq. Yekunda sübut etdik ki, APOEL-in "Düdelanj"a məğlubiyyəti sırf təsadüf nəticəsində olub".