“Zirə” “Neftçi”ylə bərabərə qalmaqla (1:1) özü haqda müsbət fikirləri bir az da yüksəltdi.

Cari mövsümə uğurlu başlayan, çempionluq yolunda əsas namizədlərdən hesab olunan “Qarabağ”la “Sabah”ı məğlub edən “qartallar” “Neftçi”yə də uduzmadı.

Rəşad Sadıqovun rəhbərlik etdiyi kollektiv 7 oyundan sonra topladığı 16 xalla liderlik kürsüsünü inamla qoruyur.

Vəziyyət bu cür davam etsə, zirəlilərin çempionluq uğrunda mübarizə aparması və son turlara qədər “qızıl” iddiasını ortaya qoyması təəccüb doğurmayacaq.

Komandanın serbiyalı legioneri Andriya Lukoviç Sportinfo.az-a açıqlamasında “Zirə”nin çempionluq şanslarından söz açıb:

“Çempionatın əvvəlində məqsədimiz avrokuboklara vəsiqə qazanmaq idi. Hədəf hələ də qüvvədə qalır.

Bu gün çempionluq barədə danışmaq doğru olmaz. Çünki cəmi 7 tur geridə qalıb və qarşıda bizi daha çətin oyunlar gözləyir.

Turnir cədvəlinin ilk pilləsində qərarlaşmağımız futbolçuların motivasiyasını bir az da artırır. Çox yaxşı komandaya sahib olduğumuzu deməliyəm.

Kollektivdə xoş əhval-ruhiyyə hökm sürür, hamı bir-birinə kömək edir. Ancaq bu dəqiqə heç kim çempionluq haqda düşünmür.

Şəxsən məndə belə bir fikir yoxdur. Növbəti oyuna baxırıq, ona hazırlaşırıq. Sonda vəziyyət dediyiniz kimi olsa, buna sevinərik”.

Ötən ilin yayından “qartallar”ın şərəfini qoruyan 28 yaşlı yarımmüdafiəçi cari mövsümdə 2 oyunda cəmi 5 dəqiqə şans qazanıb.

HƏBİB