Çətin bir dönəmdən keçir «Zirə». Salifu Sumanın satışı, Rafael Utziqin qaçışı dəngələri dəyişib burada.
Hansısa bir təlatümdən danışmırıq, hələ ondan əsər-əlamət yoxdur.
«Zirə»nin builki büdcəsi azalıb. Ona görə də Rəşad Sadıqov riskə getmədi, yayı tanıdığı futbolçuları düşərgəyə cəlb eləməklə kifayətləndi.
Onların isə komandanı gücləndirməsini demək tezdir. Ola bilsin, heç gücləndirmədilər, Sadıqova yalnız məşqdə say düzəltmək üçün lazım olsun.
Qəbələ səfəri bir həqiqətin üstündən pərdəni qaldırdı. 90 dəqiqə sübut etdi ki, hər rəqibə ciddi yanaşmalı, yuxarıdan-aşağı baxmamalısan.
Sayacaqsan ki sayılasan. Saymasan, sayılmayacaq.
«Zirə» o qədər rahat idi, o qədər rahat idi ki... Sərin mehdən necə bihuş olmuşdularsa, ilk 30 dəqiqədə nə baş verdiyini anlamağa güclük çəkdilər.
«Qəbələ» elə birinci yarım saatda matçın taleyini həll edə bilərdi. Tələskənlik, şansızlıq və təcrübəsizlik «Qəbələ»ni əvvəl 1 xal, sonra 3 xaldan məhrum etdi.
Rəşad Sadıqovun nəticəni yox, oyunu ələ alacağına, komandanı röyadan ayıltmaq mənasında faydalanacağına şübhə etmirəm.
Qalib gəlsələr belə, mükafat düşmür onlara. Mən olsam, belə edərəm. 1 manat da vermərəm heç birinə.
MUSA
