Voleybol Federasiyası (AVF) bu idman növü ilə məşğul olan yeniyetmə qızların valideynləri ilə görüş keçirib.
Sportinfo.az xəbər verir ki, Dərnəgül Voleybol Mərkəzinin idman zalında baş tutan görüşdə 200-ə yaxın valideyn iştirak edib.
Görüşə AVF-nin 1-ci vitse-prezidenti Faiq Qarayev, vitse-prezident Vəsilə Abulova və federasiyanın başqa nümayəndələri qatılıb. Qarayev valideynlərə AVF-nin gənc oyunçularla bağlı planlarından danışıb.
O qeyd edib ki, klubların çoxluğu bizim üçün yaxşı haldı: “Amma bizi, məni əsas komanda düşündürür. Hər valideynin böyük şansları var ki, övladı millinin tərkibinə düşsün. Bu üzdən hər oyunçu var gücü ilə çalışmalıdı. Artıq belə görüşlərimiz tez-tez olacaq”.
Daha sonra ötən ilin sentyabrında Sankt-Peterburqda MDB məktəbliləri arasında keçirilən festivalda 1-ci yerin tutan şagirdlərimizə mükafatlar təqdim olunub.
Ardınca valideynlər, uşaqlar və AVF nümayəndələri söhbətlərini çay süfrəsi ərafında davam etdiriblər. AVF rəhbərliyinin növbəti görüşü yeniyetmə oğlanların valideynləri ilə olacaq.
.jpg)
