Azərbaycanın ən öndə gedən “futbol ocağı“ dağılır - Yarım milyona görə

15 Avqust 14:00 Qəbələ 2 631
Azərbaycanın ən öndə gedən “futbol ocağı“ dağılır - Yarım milyona görə

“Qəbələ” futbol akademiyası dağılmaq təhlükəsi ilə üz-üzədir.

Buna səbəb klubda yaranan maddi problemlərdir.

2009-cu ildən fəaliyyət göstərən akademiya tezliklə futbol məktəbinə çevirilə bilər. “Qəbələ”nin baş meneceri Nail Kərimov mövcud durumu belə şərh edib:

“Akademiyada komandalarımız iyulun 20-dən avqustun 1-dək olan müddətdə müxtəlif yaş qrupları toplandı, təlim-məşqlərə başladı.

Bu şəkildə hazırlıqlarımız gedir. Növbəti həftə çempionatlar start götürür. Amma bir sualımız, bir problemimiz var. O da maliyyədir.

Hal-hazırda 5-6 il əvvəllə müqayisədə zəifləmiş olsaq da, yenə də akademiya kimi fəaliyyətimizi davam etdiririk - yaşayışı, qidalanması, futbolçulara, məşqçilərə münasibət daxil olmaqla.

Amma hal-hazırda akademiya, uşaq futboluyla əlaqədar ciddi maliyyə problemi var. Ola bilər ki, bu yaxın müddətdə akademiya statustundan çıxıb, sadə uşaq-futbol məktəbi kimi fəaliyyət göstərək.

Bu, növbəti günlər üçün istisna olunmayan bir haldır. Akademiyasız "Qəbələ"ni təsəvvür eləmək belə mümkün deyil.

Ümid var, amma reallığı da unutmuruq. Mənə elə gəlir ki, maksimum bir həftə ərzində bu suallar öz həllini tapmalıdır”.

Kərimov maddi problemlərin əsas səbəbini belə açıqlayıb:

“Çünki bazamız, bilirsiniz, yaxşı meydançalarımız var. Bunu qorumaq üçün yaxşı vəsaitə ehtiyac var. Biz əyalət klubuyuq, səfərlərə həddən artıq çox gedirik-gəlirik.

Nəqliyyat xərclərimiz kifayət qədər yüksək olur. Həmçinin futbolçuları sadəcə, "oyuna apardıq-gətirdik, yaxud məşqə çıxdılar-qayıtdılar" şəklində saxlamamışıq heç vaxt.

Vitaminləşmədən, qidalanmadan, geyimlərindən tutmuş asudə vaxtlarının, istirahətlərinin təşkili, universitetlərə hazırlamaq istəyən futbolçularımızın hər birinə xırda detallara qədər təhsilərində dəstək göstərilir.

Şəxsi həyatlarında problemləri olanların hər biriylə ən xırda detallarına qədər həmişə maraqlanırıq. Təbii ki, hardasa boşluğa yol vermiş ola bilərik.

Amma əsasən işimizi görkəm xətrinə yox, həqiqətən iş görərək planlaşdırmışıq. İndi görünən odur ki, əlavə vəsait olmasa, bu dediklərimizi yarıyolda qoymaq məcburiyyətində qalacağıq”.

Sportinfo.az yaranmış durumla bağlı bir sıra yeni informasiyalar əldə edib. Redaksiyamıza daxil olan məlumata görə, AFFA akademiyanın mövcudluğunu qorumaq üçün cəmi 350 min manat ayıra biləcəyini «Qəbələ»nin diqqətinə çatdırıb.

İnfrastrukturun saxlanılmasına isə 150 min manat büdcə təklif olunub, bu da bölgə təmsilçisini razı salmayıb. Onların akademiya və bazaya aid xərc tabelini hazırlayaraq, AFFA-ya təqdim edib.

Burada göstərilib ki. təkcə akademiyanın yaşaması üçün ortalama 500 min manat lazımdır. Əgər həmin vəsait ayrılmasa, «Qəbələ» azyaşlı futbolçuların qida və yaşayış yeri ilə təmin edə bilməyəcək, onların qaldığı məkan tamamilə boşaldılacaq.

Çünki bu komandaların ixtiyarında olan otel artıq «Qəbələ»nin baş sponsorunun – «Gilan Holdinq»in nəzarətindən çıxıb və indi ora üçün də icarə haqqı ödənilməlidir.

Digər Xəbərlər
Xəbər Lenti
28 Sentyabr 14:30 "Sportinfo TV”də GÜNDƏM
28 Sentyabr 13:40 Bu imza uğur gətirir!
28 Sentyabr 01:10 Samir Əliyev: "Çətindir"
28 Sentyabr 00:40 "Bunu etməyə məcbur idik"