Bu gün "Qəbələ" Konfrans Liqasının II təsnifat mərhələsinin cavab oyununda “Fehervar”la (Macarıstan) üz-üzə gələcək.
Sportinfo.az xəbər verir ki, “qırmızı-qaralar” Qəbələdə son məşqini keçib. Klubun prezidenti Fariz Nəcəfov hazırlıq prosesini stadiondan izləyib.
Komandanın baş məşqçisi Elmar Baxşıyev yaxşı nəticəyə ümid bəslədiyini bildirib:
“İlk qarşılaşmada məğlub olsaq da, sabahkı matça hazırıq. Düşünürəm ki, komanda əlindən gələndən artığını edəcək.
Öz azarkeşlərimiz qarşısında oynayırıq və onları sevindirməyə çalışacağıq. Ümumi götürsək, komandanın səfərdəki ilk matçda nümayiş etdirdiyi oyundan məmnun qaldım.
Görüşün müəyyən vaxtlarında futbolçular istədiyimizi maksimum verməyə çalışırdılar. Oyunçumuzun zədələnməsi də komandaya təsir etdi.
İlkin Qırtımov əsas futbolçularımızdan biridir. Onun meydandan çıxması oyun planında balansı pozdu.
Rəqibi də fərqləndirərdim. “Fehervar” çox keyfiyyətli, yaxşı heyətə malik kollektivdir. Amma yenə vurğulayıram ki, “Qəbələ” də rəqibimiz qədər keyfiyyətlərə malikdir.
Düşünürəm ki, hər iki tərəfi maraqlı matç gözləyir. Turnirə başlamamışdan əvvəl də heyətimiz çox geniş deyildi.
İlkin Qırtımovun durumu hələ sual olaraq qalır. Ümid edirik ki, müsbət qərar veriləcək”.
