“Neftçi” hələ də o məşhur sualın haqqını verir: “Yenə nə olub, a looo xəbər, “Neftçi” uduzdu?”

Hə, “Neftçi” yenə uduzdu…

Bu klub Azərbaycanın ən köklü komandasıdır. “Qarabağ”dan, “Turan Tovuz”dan, “Kəpəz”dən daha köklüdür.

Ölkənin “qara qızıl”ının adına şərik olan komanda “Qarabağ”la birlikdə avrokuboklarda boy göstərmək, güc nümayiş etdirmək əvəzinə, dünən ortaya çıxan “Şamaxı” ilə, “İmişli” ilə rəqabətdədir. Heç onlara da gücü çatmır…

“Neftçi”nin baş məşqçisi Samir Abasovun nəyi olmasa da, həmişə yaxşı bəhanələri olur. Gah istidən, gah meydançadan, gah vaxt azlığından, gah hakimdən, gah futbolçusunun qırmızı vərəqə almasından şikayətlənir.

Biri bu adama başa salsın ki, sən “Sumqayıt”da deyilsən, ölkənin ən köklü komandasının “sükanı arxasında”san.

Kimsə yoldaş Abasova izah etsin ki, sənin komandanın oynadığı şərtlər altında başqaları da eyni çempionatda oynayır, onlar dumanlı, yağışlı, möhtəşəm meydançalara sahib İngiltərə Premyer Liqasında mübarizə aparmırlar.

Nəhayət, bir nəfər Samir müəllimə desin ki, limiti dolmaq üzrədir. Məsələ təkcə uğursuz nəticələr deyil, oyundur, oyun şəklidir, sxemdir, üslubdur.

“Qarabağ” Azərbaycan futbolunun yükünü təkbaşına daşımamalıdır, meydanda tək olmamalıdır. “Köhlən atlar” İspaniya üçün “Barselona” nədirsə, Azərbaycan üçün odur. Azərbaycanın “Real”ı “Neftçi” olmalı idi və ya olmalıdır. Amma Abasovun “Neftçi”si olsa-olsa, “Levante”dir, “Elçe”dir hazırda Azərbaycan futbolunda (komanda.az).

Kürşad