"Neftçi"nin bu mövsüm də uğursuz çıxışı davam edir.

"Ağ qaralar" bu dəfə "Turan Tovuz"la bacarmadı - 0:1.

Nə oyun, nə də nəticə haqqında uzun-uzadı danışmayacam. Samir Abasova hələ də inanıram. Düzdü, ötən mövsümdən davam edən inamımda yanılıram. Nəticələr çox şeyi deyir, amma ən azı birinci dövrənin sonuna qədər gözləməyi, səbr etməyi məqbul hesab edirəm.

Dərdim isə başqadır...

Qapıçı Kenan Piriç 3 görüşdü səhv edir, amma yerini itirmir. Niyə? Komanda "Şamaxı" ilə görüşdə ona görə qələbədən oldu, "İmişli"li ilə görüşdə onun səhvindən vurulacaq qola Elvin Bədəlov mane olmaqla 1 xalı xilas etdi.

Son oyunda yenə qolu rəqibə hədiyyə etdi. Olabenin ustalığı öz yerində, amma Kenanın "payı" daha çox idi.

Limitin ləğvinə qarşı çıxanda dostlar israr edirdi ki, kim güclüdür oynasın. Futbolda milliyət önəmli deyil. İndi Kenan Rzadan güclüdür deyə qapıdadır? Buna heç kim məni inandıra bilməz.

Sadəcə aldığı maaşa, əcnəbi statusuna görə heyətdə yeri təmin olunub. Özü də yönlü-başlı məşqlə çıxmadan, təlim-məşq toplanışı keçmədən.

Və belə nümunələr təəssüf ki, digər klublarda da var. İşə yeni start verilib, zaman ötsün vəziyyət daha ağır olacaq, proses sürətlənəcək.

Bu yerə mənə bir şey maraqlıdır...

Görəsən, 15-20 azərbaycanlının 5-10 min civarında maaş almasından narahat olanların kenanların 50-60 min dollar almasına münasibəti necədir?

XANOĞLAN İMANOV