Çempionlar Liqasının builki liqa mərhələsində türk dünyası 3 klubla təmsil olunacaq.

Azərbaycandan «Qarabağ», Türkiyədən «Qalatasaray» və Qazaxıstandan «Kayrat» burada mübarizə aparacaq.

«Fənərbaxça» da həmin siyahıda ola bilədi.

Di gəl, Joze Mourinyonun çalışdırdığı «sarı-göylər» pley-off mərhələsində «Benfika»ya uduzdu. Özü də «Fənər»ə transferi gündəmə gələn Keret Aktürkoğlunun yeganə qoluyla Avropanın bir nömrəli klub turnirinə vida etdilər.

«Kayrat» ilk dəfə ÇL-də yarışacaq. Alma-Ata komandası Qazaxıstan futbolunun dünənidir.

Azərbaycanda «Neftçi» necə, onlarda da «Kayrat» elə.

SSRİ-nin yadigarı olan «Kayrat»ı yaşlı və orta nəsil yaxşı xatırlayır. Və yəqin ki, «Neftçi»nin Bakıda «Kayrat»a 6:0 qalib gəlməsi də hələ hafizələrdən tam silinməyib.

O dönəmdən bəri çox şey dəyişib, «Kayrat» görün hara gedib çıxıb, baxın «Neftçi» haradadır, yerində sayır.

Qazaxların «Qarabağ»ı «Astana»dır.

«Astana» illər əvvəl ÇL-də qüvvəsini sınayıb. «Kayrat», nəhayət, «Astana»nın «diktatura»sına son qoya, zirvəyə qayıda bildi və bunu Çempionlar Liqasında tarixi uğura imza atmaqla qeyd etdi.

Güman ki, bu gün «Neftçi» azarkeşləri «Kayrat»ın qazandığı nəticələri görüb köks ötürür və fikirləşir: «Görən, biz bu sevinci nə vaxt yaşayacağıq?».

Proqnoz vermək olmur. Futbolda yalnız nəyisə, nələrisə təxmin etmək mümkündür.

Üfüqdə isə hələlik belə bir işıqucu görünmür, deyəsən ki, hə, «Neftçi» filan vaxt «Kayrat»a yol yoldaşı olacaq.

ELNUR