“Bugünə qədər mənə hansısa real təklif olmayıb”.
Bu sözləri Sportinfo.az-a açıqlamasında hücumçu Orxan Əliyev deyib.
Yayda Azərbaycanı Qırğızıstana dəyişən forvard üz tutduğu ölkədə özünü yaxşı tərəfdən göstərməyi bacardı.
29 yaşlı ön xətt oyunçusu çempionatda meydana çıxdığı 9 oyunda rəqib qapılarından 7 qol keçirməklə adından söz etdirdi.
İndi onunla təkcə şərəfini qoruduğu “Ozqon” yox, Qırğızıstanın digər təmsilçiləri də yaxından maraqlanır.
Sözügedən ölkədə mövsüm başa çatdığından, növbəti “futbol ili” 2026-cı ildə start götürəcək. Maraqlıdır ki, Azərbaycan Premyer Liqasının heç bir təmsilçisi Orxana təklif göndərməyib.
“Xəzər Lənkəran”, “Kəpəz”, “Araz-Naxçıvan” və “Turan Tovuz” kimi bir çox komandanın şəfərini qorumuş Orxanı dinləyək:
“Bəlkə də Bakıda olduğumu bilmirlər. Bəlkə də “Ozqon”la müqaviləmin başa çatmasından xəbərsizdirlər.
Hələ ki, ciddi heç nə yoxdur. Ancaq yaxşı nəsə olacağına inanmıram”.
