"Əsas gücümü ikinci hissəyə saxlamışdım. Rəqibin parterdə mən heç nə edə bilməyəcəyini bilirdim".
Sportinfo.az xəbər verir ki, bunu V İslam Həmrayliyi Oyunlarında qızıl medal qazanan Azərbaycanın yunan-Roma güləşçisi Eldəniz Əzizli jurnalistlərə açıqlamasında deyib.
55 kq-da fəxri kürsünün ən yüksək pilləsinə qalxan idmançı finaldakı rəqibi olan özbəkistanlı Jasurbek Ortikboyevin bir epizodda onun qolunu dişləmək istəməsinə münasibət bildirib:
"Güləşdir, hər şey ola bilər. Dişi qoluma dəydi. Bunu təbii qarşılamaq, qıcıqlanmamaq lazımdır.
Əks halda, nəzarəti itirə bilərsən. İslamiadaya qələbə niyyəti ilə gəlmişdim. Şükürlər olsun ki, arzuma çatdım".
Əzizli 10 - 18 sentyabrda Serbiyanın paytaxtı Belqradda keçiriləcək dünya çempionatındakı hədəfini də açıqlayıb:
"Azərbaycanın yunan-Roma güləşi tarixində 2 qat dünya çempionu yalnız Fərid Mansurovdur. Mən bu sevinci bir dəfə yaşamışam. Məqsədim ikinci dəfə dünya çempionu olmaqdır".