"Liverpul"un futbolçuları Trent Aleksander-Arnold və Nabi Keyta İspaniyada "Real"a uduzduqları Çempionlar Liqasının 1/4 finalının ilk matçından sonra irqçiliyə məruz qalıb.
Sportinfo.az xəbər verir ki, hər iki oyunçuya instaqramda meymun emojisi ilə birlikdə çoxsaylı şərhlər yazılıb. Sosial şəbəkə məsələni araşdırmağa başlayıb.
Qarşılaşma "Real Madrid"in 3:1 hesablı qələbəsi ilə bitib. Aleksander-Arnold Mersisayd təmsilçisinin buraxdığı ikinci qolda səhvə yol verib.
Keyta isə birinci hissədən sonra əvəzlənib. Komandalar arasındakı cavab oyunu aprelin 14-də olacaq.