“Sabah”ın yeni baş məşqçisi bəllidir.
Xorvat Jelko Sopiçlə vidalaşan paytaxt klubu yenə əcnəbiyə tapşırılacaq.
Sportinfo.az-ın futbolinfo.az-a istinadən məlumatına görə, “Sabah”a ispan Raul Ruis Qonsales Rianço rəhbərlik edəcək.
Yaxın günlərdə təyinat rəsmən açıqlanacaq. 60 yaşlı mütəxəssis 2005-ci ildən başlayaraq vətənində “Ximnastika”, “Rasinq” və “Levante”nin fiziki hazırlıq üzrə məşqçisi işləyib.
Daha sonra Rusiyada “Rubin”in məşqçilər korpusunda yer alıb, 2014-cü ildən Kiyev “Dinamo”sunda köməkçi kimi fəaliyyət göstərib. 2016-18-ci illərdə Ukrayna millisində baş məşqçi yardımçısı olan Rianço sonradan yenə Rusiyaya qayıdıb.
2018-ci ildə Moskva “Spartak”ının baş məşqçisi Massimo Karreranın yardımçısı olan ispan ilk dəfə baş məşqçi kimi ölkəmizdə debüt edəcək.