“Çox yaxşı, məzmunlu oyun alındı”.
Sportinfo.az xəbər verir ki, bunu “Sabah”ın baş məşqçisi Murad Musayev Azərbaycan Premyer Liqasının XXIV turunda “Şamaxı” üzərində 5:1 hesablı qələbə qazandıqları oyun barədə danışarkən deyib.
Rusiyalı mütəxəssis qarşılaşmadan sonra komandasının çıxışını dəyərləndirib:
“Çox yaxşı kombinasiyalarla gözəl qollar vurduq. Xüsusən də, standart vəziyyətlərdən sonra. Sadəcə ikinci hissəyə o cür başlamağımız xoşuma gəlmədi.
Amma ikinci hissənin yarısı bizim nəzarətimiz altında keçdi. Oyunu sakitləşdirdik və bizə lazım olan 2 qol vurduq”.
Musayev “Şamaxı”dakı baş məşqçi dəyişikliyinə də toxunub:
“Rəqibin necə oynayacağını bilmirdik. Çünki onlarda baş məşqçi dəyişikliyi olmuşdu. Yeni baş məşqçiləri əvəzedici heyətin çalışdırıcısıdır.
Müxtəlif sistemdən istifadə edir. Bu oyunda da iki fərqli sistemdən yararlandılar. Tez reaksiya verə bildiyimiz üçün məmnunam. Qələbə münasibətilə azarkeşlərimizi təbrik edirəm”.