Bu gün "Sabah" Çempionlar Liqasında 3-cü tur oyununa çıxacaq.

Valdas Dambrauskasın komandası Dortmund "Borussiya"sını qəbul edəcək.

Hazırda iki turdan sonra hər iki komandanın 3 xalı var. Qol nisbətinə görə, "Sabah" 22-ci, "Borussiya" isə 18-ci pillədə qərarlaşır.

“Borussiya”nın ən həssas nöqtəsi “Sabah”ın topa sahib olduğu anlardan daha çox, top itirildikdən sonrakı keçidlərdə üzə çıxa bilər. Almaniya təmsilçisi hücuma çoxsaylı futbolçu ilə qoşulduqda arxa xətdə və cinah müdafiəçilərinin arxasında boş sahələr yarana bilər.

“Sabah” bu sahələrə vaxtında və dəqiq ötürmələrlə daxil ola bilsə, rəqibin fərdi üstünlüyünü neytrallaşdırmaq üçün real imkan əldə edəcək.

Burada əsas şərt hücum keçidlərinin sürəti, ilk ötürmənin keyfiyyəti və son qərarın düzgün verilməsidir.

“Sabah”ın digər üstünlüyü öz meydanında göstərdiyi nəticələrdir. “Borussiya” ilə oyundan əvvəl klub Çempionlar Liqasında keçirdiyi beş ev oyununu qazanmış və həmin görüşlərdə 14 qol vuraraq cəmi iki qol buraxmışdı.

Bu göstəriciyə təsnifat mərhələsinin oyunları da daxildir. Üstəlik, komandanın UEFA turnirlərində keçirdiyi oyunların heç birinin qolsuz başa çatmaması onun hücum futboluna meyilli olduğunu göstərir.

Ancaq “Sabah”ın güclü tərəfləri ilə yanaşı, nəzərə alınmalı riskləri də var. “Slaviya” Praqa üzərində 2:0 hesablı qələbəyə baxmayaraq, gözlənilən qollar göstəricisində rəqib 2,07-yə qarşı 1,43 üstünlüyə malik olub.

Praqa təmsilçisi zərbələrdə 18:13, qapıya dəqiq zərbələrdə isə 8:6 üstün olub. “Sabah”ın qapısını toxunulmaz saxlaması müdafiə dayanıqlığını və fürsətlərdən istifadəni göstərsə də, “Borussiya”kimi rəqibə qarşı eyni sayda təhlükəli imkan vermək ciddi risk yarada bilər.

Buna görə “Sabah”ın optimal planı yalnız müdafiəyə çəkilmək olmamalıdır.

Komanda müdafiə blokları arasında məsafəni qoruyaraq “Borussiya”nın mərkəzdən irəliləməsini çətinləşdirməli, topu qazandıqdan sonra isə sürətli hücumlarla rəqibin müdafiə xəttini geriyə qaçmağa məcbur etməlidir.

Standart vəziyyətlər də belə qarşılaşmada mühüm rol oynaya bilər. Əsas məsələ topu qazanmaq deyil, onu qazandıqdan sonra düzgün istifadə etməkdir.

“Borussiya” nın Bakıya səfəri komanda üçün rahat dövrə təsadüf etmir. Çempionlar Liqasının əvvəlki turunda Norveçdə “Bude-Qlimt”ə 0:1 hesabı ilə məğlub olub,

Bundesliqada isə Berlin “Union”u ilə qolsuz heç-heçə ediblər. Beləliklə, komanda ardıcıl iki oyunda qol vura bilməyib.

Bu nəticələr “Borussiya”nın hücum potensialının aşağı olması demək deyil, lakin son ötürmə, hücumların tamamlanması və rəqib müdafiəsini açmaq məsələlərinin hazırda xüsusi əhəmiyyət daşıdığını göstərir.

“Borussiya”nın Bakıya yalnız xal qazanmaq üçün deyil, əvvəlki nəticələrdən sonra özünü təsdiqləmək məqsədilə gələcəyini göstərir.

“Borussiya”nın heyətində Qreqor Kobel, Niko Şlotterbek, Seru Girassi, Feliks Nmeça, Marsel Sabitzer və Ceymi Bellingem kimi futbolçuların olması fərdi keyfiyyət baxımından ciddi üstünlük yaradır.

“Sabah” üçün burada psixoloji məqam da vacibdir. “Borussiya”nın favorit olması Azərbaycan təmsilçisinin üzərinə nəticə baxımından daha az təzyiq qoyur.

Dambrauskasın futbol fəlsəfəsində səhv etmək qorxusu olmadan, inamla və böyük səylə oynamaq əsas prinsiplərdən biridir. “Sabah” bu yanaşmanı meydanda reallaşdıra bilsə, oyunu yalnız rəqibin üstünlüyünə uyğunlaşdırmaq əvəzinə öz hücum imkanlarını da yarada bilər.

“Borussiya”nın Azərbaycan futbolu ilə Avropa turnirlərində əvvəlki təcrübəsi var və bu tarixçə almanların xeyrinədir.

2010-cu ildə Avropa Liqasının pley-off mərhələsində “Qarabağ”ı Dortmundda 4:0, Bakıda isə 1:0 hesabı ilə məğlub ediblər. 2015-ci ildə “Qəbələ” ilə qarşılaşmalarda da almanlar hər iki oyunda qalib gəliblər: Bakıda 3:1, Dortmundda isə 4:0.

Beləliklə, “Sabah”la görüşdən əvvəl “Borussiya” Azərbaycan klublarına qarşı keçirdiyi dörd rəsmi Avropa oyununda dörd qələbə qazanıb, 12 qol vurub və cəmi bir qol buraxıb.

“Borussiya”nın Bakıdakı bu əvvəlki səfərləri iki fərqli stadionda baş tutub: “Qarabağ”la oyun Tofiq Bəhramov adına Respublika Stadionunda, “Qəbələ” ilə görüş isə “Bakcell Arena”da keçirilib.

“Sabah”la qarşılaşma isə Bakı Olimpiya Stadionunda baş tutacaq. Beləliklə, alman klubu Azərbaycan paytaxtında üçüncü dəfə avrokubok matçına çıxacaq.

“Sabah” - “Borussiya Dortmund” qarşılaşmasında favorit almanlardır. Onların Avropa təcrübəsi, heyət dərinliyi və fərdi keyfiyyəti müqayisədə üstün görünür. Bununla belə,

“Borussiya” son iki oyununda qol vura bilməyib, “Sabah” isə “Slaviya” üzərində qələbə ilə özünəinam qazanıb və ev oyunlarında güclü nəticələr göstərib.

Azərbaycan təmsilçisinin əsas şansı müdafiədə intizamlı qalmaq, “Borussiya”nın hücum quruluşundakı boşluqlardan istifadə etmək, sürətli keçidlər yaratmaq və qol imkanlarını yüksək dəqiqliklə tamamlamaqdır.

Əgər “Sabah” oyunu yalnız rəqibin diktə etdiyi tempdə keçirməsə və öz hücum təhlükəsini də göstərə bilsə, “Borussiya” üçün çətin sınaq yaradacaq.

Bu görüşün əhəmiyyəti yalnız üç xal uğrunda mübarizə ilə məhdudlaşmır. “Sabah” üçün bu, Azərbaycan futbolunun yeni Avropa mərhələsində özünü təsdiqləmək,

“Borussiya” üçün isə favorit statusunu meydanda doğrultmaq imkanıdır. Kağız üzərində üstünlük “Borussiya”dadır, amma oyunun taleyini adlar deyil, meydanda verilən qərarlar müəyyən edəcək.

SPORTINFO.AZ