Ümumdünya Səhiyyə Təşkilatı (ÜST) ötən aylarda beynəlxalq narahatlıq yaradan hantavirus epidemiyasının iyulun 2-də rəsmi olaraq başa çatmasının gözlənildiyini açıqlayıb.
Qurumun baş direktoru Tedros Adhanom Qebreyesus Cenevrədə keçirdiyi mətbuat konfransında bildirib ki, indiyədək virusa yoluxanların sayı 13 nəfər olub və onlardan 3-ü həyatını itirib.
O bildirib ki, mayın 2-də epidemiya barədə xəbərdarlıq daxil olduqdan sonra 33 ölkə və ərazidə 650-dən çox təmasda olmuş şəxs müəyyən edilib.
Onların böyük əksəriyyəti karantin müddətini başa vurub, qalan 54 nəfərin isə iyulun 2-dək müşahidə altında qalacağı bildirilib.
“Əgər həmin tarixə qədər yeni yoluxma halı qeydə alınmasa, epidemiya başa çatmış hesab olunacaq”, – deyə Qebreyesus vurğulayıb.
Epidemiya Niderland bayrağı altında üzən “MV Hondius” kruiz gəmisində qeydə alınan ağır tənəffüs yolu xəstəliklərindən sonra gündəmə gəlib.
Gəmi aprelin 1-də Argentinanın Uşuaya şəhərindən yola düşərək Cənubi Atlantik okeanındakı bir sıra adalara səfər edib. Səfər zamanı bir sərnişin aprelin 11-də xəstələnərək vəfat edib. Sonradan daha iki sərnişinin ölümü hantavirusla əlaqələndirilib.
Qalan sərnişinlər daha sonra İspaniyanın Tenerife adasında təxliyə olunub və nəzarətə götürülüblər.
