“Neftçi” – “Qarabağ” qarşılaşmasından sonra (2:1) Cenk Sümerin sevincini görməyə dəyərdi.

“Ağ-qaralar”ın türkiyəli icraçı direktoru təbrikləri qəbul edir, sevincindən özünə yer tapmır, gözləri parlayırdı.

Emosiyaların zirvəyə yüksəldiyi anda sabiq “Beşiktaş”lı Sportinfo.az-ın suallarını elə həmin yerdə - qələbənin qazanıldığı meydanda məmnuniyyətlə cavablandırdı.

- Yəqin ki, bilirsiniz, “Neftçi” 2021-ci ilin mayın 19-dan bu yana “Qarabağ”ı uda bilmirdi...

- Bilirəm. Onsuz da məqsədimiz “Neftçi”ni haqq etdiyi, layiq olduğu yerə qaytarmaqdır. Klub olaraq çətin dönəmlərdən keçməkdəyik. Ağır məğlubiyyətdən sonra böyük bir dəyişiklik edib, əsl “Neftçi”nin adına reaksiya göstərib əzmkar qələbə qazandıq. O cür məğlubiyyətdən sonra komandanı oyuna hazırlamaq, qələbəyə kökləmək, döyüşkən ruh yaratmaq həqiqətən çətin idi. Azarkeşlərimiz boyunlarını bükməsin, “Neftçi” haqq etdiyi yerlərə gələcək.

- 1:5-dən sonra qələbəyə inam haradan, nədən yaranmışdı?

- Bizdə geriyə addım yoxdur. “Neftçi”nin adı uğur deməkdir. Bu adın özü bəs edir. Daha da yaxşı olacağına inanıram.

- Bu qələbədən sonra son 4 oyunda rəqiblər “Neftçi”yə qarşı ikiqat əzmlə oynayacaq.

- “Neftçi”ni özünə oxşamağa başladığı müddətdə rəqiblərin necə oynaması önəmli deyil. Əlbəttə, hər birinə böyük hörmətimiz var. Laım olan anda lazımi reaksiyanı verib lazım olan nəticəni alacağıq.

- Azarkeşlərə nə demək istəyirsiniz?

- Hər birinə sonsuz minnətdarıq. Qışda, yayda, istidə, qarda, yağışda, küləkdə hər zaman yanımızdadırlar. Allah hər birindən razı olsun. Biz də qazandığımız nəticələrlə onları sevindirməyə çalışırıq.

- Bu qələbəni tribunalarda möhtəşəm ab-hava yaratdan azarkeşlərə, yoxsa gəlişi ilə komandanı dirçəldən Yuri Verniduba həsr edirsiniz?

- Bu, fərd olaraq kiməsə yox, “Neftçi” camiəsinə hədiyyədir. Azarkelərimiz, Yuri Vernidub, texniki və inzibati heyət, futbolçular, bazada çalışanlar, rəhbərlik, ürəyi “Neftçi”ylə döyünən hər kəs bu hədiyyəyə layiqdir.

HƏBİB