“İnsanın doğulduğu ölkə onun imkanlarına və gələcəyinə çox böyük təsir göstərir”.

“İmişli”nin kapitanı Azər Salahlının bacısı Jalə Salahlı “instagram” hesabında maraqlı paylaşımla diqqət çəkib.

Ölkə xaricində yaşayan xanım yaydığı postda qardaşı ilə bağlı etiraflar edib.

O, Azərin Kriştianu Ronaldonu özünə kumir seçməsindən bəhs edərək, futbolla məhz Azərbaycanda məşğul olduğuna görə təəssüfünü bildirib:

“Təəssüf ki, Azər kiçik yaşlarında olarkən Kriştianu Ronaldo onun futbolçu kimi formalaşdığı akademiyanı heç vaxt ziyarət etməmişdi. Buna baxmayaraq, Azər Ronaldonu özünə kumir seçdi və bütün futbol yolu boyunca onu özünə örnək götürdü.

2020 və 2021-ci illərdə qardaşım Ronaldoya qarşı iki dəfə oynamaq imkanı qazandı. O, Azərbaycan milli komandasının əsas heyətində meydana çıxan 11 futbolçudan biri idi. O, ölkəmizdə mövcud olan şərait və imkanlar daxilində real olaraq əldə edilə biləcək hər şeyə nail olmuş idmançılardan biridir və bunu yalnız öz zəhməti, əzmkarlığı və qətiyyəti sayəsində bacarıb.

Bu hekayəni təkrar-təkrar paylaşmağımın səbəbi odur ki, indiyədək heç kim onun əsl mahiyyətini lazımınca vurğulamayıb. Məhz buna görə də mən həmişə deyirəm ki, əgər Azər başqa ölkədə doğulsaydı və eyni futbol yolunu keçsəydi, böyük ehtimalla bu gün onu dünyanın aparıcı futbol liqalarından birində izləyirdik.

Bu gün insanlar illər əvvəl Gürcüstan və Özbəkistanda akademiya səfərləri zamanı çəkilmiş məşhur futbolçuların fotolarını onların bugünkü peşəkar karyeralarındakı şəkillərlə müqayisə edirlər. Ronaldo dünyanın hər yerində milyonlarla gəncə ilham verib və onların arasında Azər Salahlı adlı azərbaycanlı bir oğlan da var idi.

Mən hesab edirəm ki, Azər bunu yaşamaq fürsətinə sahib olduğu üçün Allahın sevimli bəndələrindən biridir. Bu gün onunla fəxr etdiyim kimi, əminəm ki, gələcəkdə övladları da onunla fəxr edəcəklər.

Bizim də zəhmətkeş, məqsədyönlü və intizamlı futbolçularımız var və onlar tanınmağa, qiymətləndirilməyə layiqdirlər”.

32 yaşlı futbolçu karyerası ərzində “İnter” (indiki “Şamaxı”), “Qarabağ”, “Sumqayıt”, “Neftçi” və “İmişli”nin şərəfini qoruyub.

Azərbaycan millisinin heyətində 22 oyunda meydana çıxmaqla 1 qola imzasını yazdırıb.

HƏBİB / SPORTİNFO.AZ