DÇ-2026-da finalçıların adları artıq məlumdur.

Favoritlərdən sayılan Fransa yarımfinalda dayandı.

Didye Deşamın çalışdırdığı kollektiv burada İspaniyadan 2 cavabsız qol buraxaraq, iddiası ilə vidalaşdı.

Fransa üçün İspaniyaya qarşı keçirilən yarımfinal sadəcə, məğlubiyyət deyil, komandanın demək olar bütün problemlərini üzə çıxaran nümunəvi bir oyun oldu.

Bununla belə, bir məqamı xüsusi qeyd etmək lazımdır: İspaniyanın uğurunu yalnız rəqibin zəif oyunu ilə izah etmək olmaz.

Luis de la Fuente rəhbərliyindəki komanda turnirin ən yaxşı oyunlarından birini keçirdi, matça tam nəzarət etdi və finala yüksəlməyi tamamilə haqq etdi.

Fransa ona görə uduzmadı ki, İspaniya həmin axşam təsadüfən daha güclü idi. İspanlar ardıcıl və sistemli şəkildə rəqibi öz futbolundan imtina etməyə məcbur etdilər.

Statistika meydandakı mənzərəni tam təsdiqləyir. Fransa rəqib qapısı qarşısında minimum təhlükə yarada bildi və oyunu gözlənilən qollar (xG) baxımından çox aşağı göstərici ilə başa vurdu.

Komanda görüş ərzində demək olar ki, real təhlükə yaradan epizodlar təşkil edə bilmədi. Halbuki erkən buraxılan qoldan sonra ilk dəqiqələrdən etibarən hesabı bərabərləşdirmək üçün hücum yolları axtarmağa məcbur idi.

Əsas problem xətlər arasındakı əlaqənin tamamilə itməsi oldu. Hücum xətti yarımmüdafiədən, yarımmüdafiə isə müdafiədən ayrı fəaliyyət göstərirdi.

Topun hücumçulara çatdırılması əsl problemə çevrilmişdi. İspaniya bütün ötürmə variantlarını bağlayır,

Fransa isə getdikcə daha çox fərdi qərarlara üstünlük verirdi. Bu qərarlar isə demək olar ki, heç bir nəticə vermirdi.

Luis de la Fuente komandası Fransa hücumçularını cinahlara sıxışdırdı və orada Pedro Porro ilə Mark Kukurelya kimi cinah müdafiəçilərinə qarşı təkbətək üstünlük qazanmağa imkan vermədi. Bu xüsusilə ikinci hissədə daha aydın görünürdü.

Fasilədən sonra Didye Deşamın komandası tamamilə çaşqın təsir bağışladı. Müdafiədə futbolçular həddindən artıq geriyə çəkilir, topa sahib olduqları zaman isə xətlər arasındakı məsafə çox böyüyürdü.

Hücumçular komanda yoldaşlarından təcrid olunurdu, yarımmüdafiəçilər isə hücumlara vaxtında qoşula bilmirdi. Nəticədə Fransa oyunu vahid sistemdən uzaq, bir-biri ilə əlaqəsi olmayan epizodlara parçalandı.

Oyunun son dəqiqələrində yaşanan epizod bu mənzərəni simvolizə edirdi. Qarşılaşmanın bitməsinə az qalmış Fransa iki top fərqi ilə geridə idi.

İspaniyanın növbəti top qazanmasından sonra Fransa hücum xətti yenə də komandanın qalan hissəsindən tam təcrid olunmuş vəziyyətdə qaldı.

Tək qalan mərkəz yarımmüdafiəçisi eyni anda həm hücumu başlada, həm də müdafiəni sığortalaya bilməzdi. Həmin axşam Fransa futbolu məhz belə görünürdü struktur yox idi, balans yox idi, qarşılıqlı anlaşma yox idi.

Fərdi oyunçular da komandanı xilas edə bilmədilər. Maykl Olise turnirin ən zəif oyunlarından birini keçirdi, davamlı top itkiləri etdi və boş zonalar tapa bilmədi. Usman Dembele pressinqdə fəal olsa da, çox vaxt komanda yoldaşları ilə koordinasiyasız hərəkət etdiyindən təzyiq effekt vermirdi.

Kilian Mbappe də demək olar ki, oyundan tamamilə təcrid olunmuşdu. Müdafiə arxasına qaçış etmək üçün imkanlar yaransa da, İspaniya müdafiəsi hər dəfə vaxtında reaksiya verdi.

Komanda yoldaşlarının dəstəyi isə Fransa kapitanına çatışmırdı. Mbappe sürətlənən kimi isə ispan müdafiəçilərinin ustalıqla qurduğu ofsayd tələsinə düşürdü.

Mübahisəli qərarlardan biri də ilk dəqiqələrdən Bredli Barkolanın Dezir Duenin əvəzinə meydana buraxılması idi. Əksinə, Luis de la Fuente-nin Fabian Ruisi start heyətinə daxil etməsi tam özünü doğrultdu.

İspan yarımmüdafiəçisi oyunun əsas simalarından birinə çevrildi və mərkəz zonasında üstünlüyün təmin edilməsində böyük rol oynadı.

Matçın gedişində yaranan əlavə çətinliklər də Fransaya mane oldu. Adrien Rabyonun erkən sarı vərəqə alması məşqçilər korpusunu planlarını dəyişməyə məcbur etdi.

Orelyen Çuameni zədədən sonra optimal formasından uzaq görünürdü. Birinci hissədə Vilyam Salibanın itkisi müdafiənin təşkilinə ciddi zərbə vurdu. Lyuka Din də öz cərimə meydançasında buraxdığı kobud səhvlə rəqibin qol vurmasına şərait yaratdı.

SPORTİNFO.AZ