Niderland kral ailəsi eyni gündə həm Niderland, həm də Kürasao komandasının dünya çempionatı oyunlarını stadiondan izləyərək diqqət mərkəzinə düşüb.

Sportinfo.az xəbər verir ki, Kral Villem-Aleksandr və Kraliça Maksima günə ABŞ-nin Hyuston şəhərində Niderland millisinin İsveç üzərində 5:1 hesablı qələbəsini izləməklə başlayıblar.

Daha sonra isə sürətli uçuşla Kanzas-Sitiyə gedərək Kürasao–Ekvador matçında (0:0) tribunada yer alıblar.

Kürasao kiçik ada dövləti olmaqla yanaşı, Niderland Krallığının tərkib hissəsidir. Bu səbəbdən kral ailəsi hər iki komandanı dəstəkləyib və fərqli oyunlar üçün narıncı Niderland şərflərini mavi Kürasao atributları ilə dəyişib.

Kral Villem-Aleksandr RTL televiziyasına açıqlamasında bildirib ki, bu DÇ onlar üçün xüsusi əhəmiyyət daşıyır: “İki komandamız var və hər ikisini dəstəkləmək böyük sevincdir. Bu turnir bizim üçün unikal bir təcrübədir”.

Kürasao tərəfdə isə futbolçular kral ailəsinin stadionda olmasının motivasiya yaratdığını bildiriblər.

Niderland kralı və kraliça DÇ-də oyundan sonra komandanın soyunma otağına baş çəkiblər. Kral komanda üzvləri ilə rəqs edərək, sevincini ifadə edib.

Kral ailəsinin bu addımı turnirdə diqqət çəkən anlardan birinə çevrilib. Kürasao futbolçuları tarixi nəticəni qeyd edərkən, Niderland kralı və kraliçası onları şəxsən təbrik edib.

Kürasao bu nəticə ilə DÇ-də ilk xalını qazanaraq tarix yazıb və turnirin ən kiçik iştirakçılarından biri kimi diqqət mərkəzinə düşüb.