"Qarabağ"la Norveçə yollanan heyət arasında Peşəkar Futbol Liqasının prezidenti Elxan Səmədov da yer almışdı.
Avropa Liqasının qrup mərhələsinin 5-ci turunda "Atlılar"ın "Molde" ilə qələbəyə bərabər heç-heç ilə başa çatan matçından (2:2) sonra Elxan bəy qarşılaşma ilə bağlı fikirlərin Sportinfo.az-la bölüşüb:
"İlk öncə "Qarabağ" komandasını təbrik etmək istəyirəm. Həqiqətən, çox yaxşı oyun keçirdilər.
Gərgin qarşılama oldu. Birinci qoldan sonra inanırdıq ki, "Qarabağ" uduzmaz.
Düzdür, sonra rəqib iki qol vurdu. Amma sonda təmsilçimiz məğlubiyyətdən xilas olmağı bacardı".
Səmədov təmsilçimizin üz-üzə qaldığı çətinliklərdən də söz açıb:
"Hava şəraiti uyğun deyildi. Biz belə havaya öyrəşməmişik. Lakin əsas odur ki, yekunda komanda lazım olanı bacardı".
O, sonda "Qarabağ"ın avrokuboklardakı gələcəyindən də qısaca danışıb:
"Bəli, Konfrans Liqasında mübarizəni davam etdirəcəyimiz rəsmiləşdi. Amma Avropa Liqası üçün mübarizə davam edir.
Qarşıda "Hakken"lə evdə oyun var. İnanıram ki, son oyunda da qələbə qazanmaq mümkün olacaq".
XANOĞLAN
