Qadın futbolçulardan ibarət Azərbaycan millisi dünya çempionatının seçmə mərhələsində növbəti oyununu keçirib.
Sportinfo.az xəbər verir ki, Siyasət Əsgərovun baş məşqçi olduğu kollektiv E qrupundakı 7-ci sınağında Bosniya və Herseqovinanın qonağı olub.
Sarayevo şəhərindəki "Qrbavitsa" stadionunda oynanılan qarşılaşma meydan sahiblərinin 1:0 hesablı qələbəsi ilə başa çatıb. Yeganə qolu görüşün əsas vaxtına əlavə olunmuş 4-cü dəqiqədə Milena Nikoliç vurub.
Bu nəticədən sonra xallarını 7-yə çatdıran Bosniya və Herseqovina 3-cü pillədəki mövqeyini qoruyub. Azərbaycan isə 3 xalla 5-ci sırada qalıb.
"Qarşılaşma çətin alındı, çünki rəqib düşündüyümüz kimi oynadı: hücum qurmağımıza imkan vermir, meydanda vaxt aparırdı".
Bunu Bosniya və Herseqovina yığmasının baş məşqçisi Samirə Hürrəm deyib. 50 yaşlı mütəxəssis qələbə qazandıqları üçün sevincli olduğunu bildirib:
"Futbolçularımı təbrik edirəm. İndi növbəti matça köklənmək üçün sakit olmalıyıq".
Yığmanın kapitanı və görüşdəki yeganə qolun müəllifi Milena Nikoliç isə qələbəyə layiq olduqlarını söyləyib:
"Kifayət qədər qol imkanları yaratsaq da, istifadə edə bilmədik. Rəqib qapıçı bir neçə epizodda yaxşı oynadı. Bütün komandanın mübarizəsi sonda nəticə verdi".