«Neftçi»də klubdaxili toplantı təşkil olunub.
Müşahidə Şurasının bir neçə üzvünün başçılığıyla keçirilən iclasda əsas komandanın məşqçi korpusu və futbolçuları iştirak edib.
Burada Premyer Liqanın geridə qalan turları geniş müzakirə olunub. Hələ də qələbə qazana bilməyən, cəmi 4 xal toplaya bilən oyunçular yönətimin haqlı sərt tənqidlərini eşidib.
Şura üzvləri kollektivə hər cür şərait yaradıldığını, öhdəliklərin tam yerinə yetirildiyini, bunun qarşılığını isə meydanda görmədiklərini bildiriblər.
Onlar Roman Qriqorçuku dəstəklədiklərini açıqlayıblar.
Klubun qərarverici şəxsləri elan eləyib ki, baş məşqçinin fəaliyyətində bir qüsur görmürlər, o, öz üzərinə vəzifəni məsuliyyətlə yerinə yetirməyə çalışır, amma futbolçular verilən tapşıqıları lazımı səviyyədə icra etmirlər.
Səlahiyyətli simalar ukraynalı mütəxəssisin işində qalacağını, onu yenə də dəstəkləyəcəklərini söyləyiblər.
Xatırladılıb ki, azarkeşlər «Neftçi»dən həmişə qələbə gözləyir və bu, onların haqqıdır. Fanatların ümidlərini doğrultmağın vacib olduğunu vurğulayan şura üzvləri deyib ki, növbəti turdan etibarən qələbələr sıralanmalıdır.
Xəbərdarlıq edilib ki, Qriqorçukun etimadını doğrultmayanlar əsas komandadakı yerini itirəcək.
SPORTİNFO.AZ
