“Forza Neftçi” bu gün Premyer Liqanın 8-ci turu çərçivəsində keçiriləcək “Qarabağ” – “Neftçi” qarşılaşmasına hazırlaşır.
Artıq azarkeş qrupunun “feysbuk” səhifəsində şənbə günü baş tutacaq oyunla bağlı elan yerləşdirilib.
Elanda komandanı dəstəkləmək istəyən fanatların 15:30-16:30 aralığında “Ulduz” metrostansiyasının yaxınlığında toplaşmasının vacibliyi qeyd olunub, Suraxanıya gediş-gəliş haqqının 2 manat təşkil etdiyi diqqətə çatdırılıb.
Elə həmin paylaşımda “Forza Neftçi” “vurduğu qolla” “Neftçi”ni oyunun ilk dəqiqələrində “Qarabağ” qarşısında 1:0 hesabı ilə önə keçirib.
Belə ki, paylaşımda rəqib komanda “Qarabağ” Ağdam yox, Bakı təmsilçisi kimi təqdim olunub. Bu isə komandanın rəqiblərini illərdir paytaxtdakı stadionlarda qəbul etməsinə atmacadır.
Prinsipial duel öncəsi “İmarət”in “forzalılar”a necə cavab verəcəyini səbrsizliklə gözləməyə dəyər.
“Azersun Arena”da keçiriləcək “Qarabağ” – “Neftçi” görüşü saat 18:00-da başlayacaq.
HƏBİB / SPORTİNFO.AZ