Bakıda keçirilən minifutbol üzrə dünya çempionatı davam edir.
Sportinfo.az xəbər verir ki, 1/8 final mərhələsi başa çatdıqdan sonra mundialın ən yaxşı 8 komandası bəlli olub.
Ardıcıl 2-ci uğur
Azərbaycan millisi özü üçün debüt çempionatı olan DÇ-2023-ün yarımfinalçısıdır. Həmin vaxt 4-cü yeri tutan yığmamız ardıcıl ikinci mundialda 1/4 final oynayacaq.
İkinci cəhddən rekordçular
Millimiz kimi Bosniya və Herseqovina da ikinci dəfə mundiala qatılıb. Balkanlılar Bakıda tarixinin rekorduna imza atıb. DÇ-2017-də 1/8 finalda uduzan yığma bu dəfə həmin səddi adlayıb. Sabiq Yuqoslaviyanın daha bir təmsilçisi tarixinin rekorduna ikinci cəhddən imza atıb. DÇ-2023-ə 1/8 finalda vida edən Monteneqro bu dəfə səkkiz ən yaxşı komanda arasıdnadır.
Çex ənənəsi
1/4 finalın ən təcrübəli komandası Çexiyadır. Bütün mundialların iştirakçısı heç vaxt 1/4 finaldan tez dayanmayıb. DÇ-2017-nin çempionu 2015, 2019 və 2023-cü illərdə yarımfinalın bir addımlığında uduzub.
Addım-addım irəli
İngiltərə tarixində 3-cü dəfə mundiala qatılıb. DÇ-2019-da qrupda qalan yığma dörd il sonra bir addım irəliləyib. Həmin vaxt britaniyalılar 1/8 finalda büdrəyib. Bakıda daha bir addım atan İngiltərə tarixində ilk dəfə 1/4 finala yüksəlib.
3-cü yarımfinal arzusunda
Çexiya kimi Macarıstan da qatıldığı bütün mundiallarda 1/4 final həyəcanı yaşayıb. Amma onlar ilk çempionata qatılmayıblar. DÇ-2017-də 1/4 finalda qalan macarlar son iki turnirdə yarımfinal oynayıb. Əvvəl 4-cü, sonra 3-cü yeri tutan komanda ardıcıl 3-cü yarımfinalın arzusundadır.
Təəccübləndirən serblər
Serbiya yığması mundialların təcrübəli komandası sayılır. 4-cü dəfə dünya çempionatına qatılan yığma ciddi uğuru ilə yadda qalmayıb. DÇ-2015 və DÇ-2023-də qrupda qalan komandanın yeganə uğuru DÇ-2019-un 1/8 finalı idi. Amma Bakıda tarixinin ən yaxşı nəticəsini göstərən Serbiya artıq 1/4 finaldadır.
Avropanın qarşısına çıxan debütant
1/4 finalda oynayacaq 8 komandadan 7-si Avropanı təmsil edir. Yeganə istisna Mavritaniyadır. Afrika təmsilçisi tarixində ilk dəfə qatıldığı mundialda iirəliləməkdə davam edir. Debütant “iştah diş altındadır” ifadəsindən ruhlanaraq yarımfinalın bir addımlığına qədər irəliləyib (idman.biz).
