“Seltik”də (Şotlandiya) çıxış edən Kamilo Duran Çempionlar Liqasının pley-off mərhələsində LASK-a qarşı keçirdiyi uğurlu oyundan sonra fikirlərini bölüşüb.

Sportinfo.az xəbər verir ki, kolumbiyalı hücumçu “The Scottish Sun”a açıqlamasında baş məşqçi Martin O'Nilin ona hansı mövqedə şans verməsindən asılı olmayaraq, maksimum güclə oynayacağını deyib.

“Hamı bilir ki, mən hücumçu kimi oynayıram. Amma məşqçi məni harada istəsə, komandanın mənə ehtiyacı olan yerdə oynayacağam. Mənə hansı tapşırıq verilsə, həmişə maksimumumu ortaya qoyacam” - deyə, Duran bildirib.

Cənubi amerikalı “Seltik”ə keçidindən sonra komandada çox yaxşı qarşılandığını da vurğulayıb.

Onun sözlərinə görə, rəhbərlik və komanda yoldaşlarının münasibəti uyğunlaşma prosesini asanlaşdırıb və bu, meydandakı çıxışına da təsir edib.

Duran LASK-a qarşı 3:0 hesabı ilə başa çatan ilk oyunda dubla imza atıb. O, matçdan sonra həmin qolların yaratdığı hissləri sözlə ifadə etməyin çətin olduğunu bildirib və “Seltik Park”dakı atmosferi xüsusi qeyd edib.

Kolumbiyalı ötən mövsüm “Qarabağ”la Çempionlar Liqasında çıxış etdiyini xatırlatsa da, “Seltik”dəki atmosferin tam fərqli olduğunu deyib.

“Seltik”in baş məşqçisi Martin O'Nil də Duranın oyununu yüksək qiymətləndirib. Təcrübəli mütəxəssis futbolçunun təkcə qollarını deyil, müdafiəyə qayıdaraq komanda yoldaşlarına kömək etməsini də xüsusi vurğulayıb.

O'Nil Duranın klubda olduğu qısa müddətdə transferinə xərclənən məbləği artıq doğrultduğunu bildirib.

“The Scottish Sun”un məlumatına görə, “Seltik” Duranın transferi üçün təxminən 6 milyon funt sterlinq ödəyib. O, “Qarabağ”ın heyətində ötən mövsüm Çempionlar Liqasında 5 qol vurub.

“Seltik” LASK-la ilk qarşılaşmada 3:0 hesablı qələbə qazanaraq cavab oyunu öncəsi ciddi üstünlük əldə edib.