Azərbaycan millisinin üzvü Ayşən Əhmədova sportal.az-a müsahibə verib.
Ötən mövsüm Türkiyədə "Fomget" klubunun heyətində çempionluq yaşamış Əhmədova bir müddət əvvəl Yunanıstanın PAOK klubuna keçib.
Sportinfo.az xəbər verir ki, o, Saloniki klubundakı məqsədlərindən söz açıb.
- PAOK Yunanıstanın ən böyük klublarından hesab edilir. Demək olar ki, bu komandaya transfer edilməklə, karyeranın ən iddialı və böyük klubuna keçmiş oldun?
- Təbii ki, hər bir futbolçu kimi mənim də məqsədlərim var. İndiyə qədər oynadığım bütün komandalarda ən yaxşısını etməyə çalışmışam. Karyeram ərzində ən iddialı klublar "Fomget" və PAOK olub.
- Maraqlıdır ki, PAOK-da oynamış və bu klubun diqqətini cəlb edən kişi futbolçumuz yoxdur. Bəlkə də, var, amma fakt odur ki, Saloniki klubu azərbaycanlı futbolçu ilə maraqlanmır. Bu məsələyə münasibətin necədir?
- Düşünürəm ki, kişi futbolunda da inkişaf var. Hər şey yavaş-yavaş olur. Daha da yaxşıya doğru gedəcək. Təbi iki, yalnız pozitiv düşünürəm.
- PAOK Çempionlar Liqasında iştirak edəcək. Klubun bu turnirdəki iddiası nədən ibarətdir?
- Komandamız Yunanıstan çempionu olub deyə, doğrudur, ÇL-də iştirak edəcəyik. Bizim birinci hədəfimiz qrupdan çıxmaqdır. Bunun uğrunda mübarizə aparacağıq. Buradakı səviyyə kifayət qədər yaxşıdır.
- Salonikidə yaşayın necə gedir? Artıq Yunanıstana öyrəşmisən?
- Bəli, artıq öyrəşmişəm. Burada hər şey yaxşıdır. Salonikidə insanlar çox istiqanlı və mehribandır. Bu səbəbdən də elə tez öyrəşmişəm.
- Futbolçularımız üçün dil baryeri olur. Maraqlıdır, səndə belə problem var, yoxsa ingilis dilində danışırsan?
- Dil baxımından problem yaşamıram.
- Artıq komandanın düşərgəsinə qoşulmusan. Səni komandada necə qarşıladılar?
- Məni burada çox yaxşı qarşıladılar, hamı mehriban və gülərüzdür. Bu, məni çox sevindirir. Əvvəlcədən tanıdığım futbolçu yoxdur burada. Ancaq özümü tək hiss etmirəm. Komanda yoldaşlarım çox mehribandır, daim ünsiyyətdəyik.
- PAOK-dakı məşqçilər, futbolçular səndən Azərbaycan millisi və ya Azərbaycan haqda nəsə soruşurlar? Onları Bakıya dəvət etmisən?
- Bəli, komandada məndən Azərbaycan haqda soruşurlar. Ölkəmiz yetəri qədər gözəl və qonaqpərvərdir. Onlara Azərbaycana gələcəkləri təqdirdə, ölkəmizi çox sevəcəklərini söyləmişəm. PAOK-da 5-6 ölkədən legioner oyunçu var. Kollektivdə yaxşı ab-hava var.