Bundan sonra Azərbaycan milli komandasının nəticələrinə Ayxan Abbasov cavabdehlik daşıyacaq.
Fernandu Santuşun istefasından sonra müvəqqəti olaraq vəzifəni icra edən 44 yaşlı çalışdırıcı azı cari seçmə mərhələnin sonuna qədər yığmanın sükanı arxasında dayanacaq.
Bəs, U-21-in aqibəti necə olacaq? Abbasovun gedişindən sonra məlum post kimə tapşırılacaq? Ayxan bəy AFFA rəhbərliyi ilə görüşdə bu mövzuda söhbət edibmi?
Səbəbkar Sportinfo.az-ın suallarını cavablandırıb:
“U-21-də görülən işlər yaxşılığa doğru gedir. AFFA prezidenti Rövşən Nəcəf söhbətimiz zamanı bu məqamı qeyd etdi.
Müəyyən planlarımızı həyata keçirmək üçün vaxta ehtiyacımız var. İstənilən halda gənclər millisinə köməyimiz dəyəcək. Biz tərəfdən nə lazım olsa, canla-başla yerinə yetirəcəyik.
Baş məşqçi məsələsinə yaxın günlərdə aydınlıq gələcək və ictimaiyyətə bu barədə məlumat veriləcək”.
Ayxan Abbasovun əsas milliyə gedişindən sonra U-21-in Fernandu Santuşun köməkçilərindən olmuş Rəşad Eyyubova tapşırılacağı gözlənilir.
HƏBİB / SPORTİNFO.AZ
