Santuş yenə öz ampluasındadır.

Belə ki, portuqaliyalı mütəxəssis bu dəfə DÇ-2026-nın seçmə mərhələsi çərçivəsində İslandiya və Ukrayna yığmalarına qarşı keçiriləcək oyunlar üçün açıqladığı heyətdə sual doğuran seçimlə yadda qalıb.

Söhbət qapı mövqeyi ilə bağlı anlaşılmaz qərardan gedir.

Siyahıda üç qolkiper var - Rza Cəfərov, Şahruddin Məhəmmədəliyev və Aydın Bayramov.

Rza Cəfərov "Neftçi"də, Aydın Bayramov da "Zirə"də hələ rəsmi oyunlarda iştirak etməyib.

Şahruddin Məhəmmədəliyevin "Qarabağ"da meydana çıxdığı tək rəsmi oyun "Sumqayıt"la matç olub.

Ağdam klubunun məğlub olduğu görüşdə "Şah"ın hansı oyundan çıxdığını hamı gördü.

Etdiyi kobud xəta qonaqların 3 xal qazanmasına rəvac verdi.

Ümumiyyətlə, bu adamın dövranı gedib. Qurban Qurbanov üçün də ikinci, bəzən də üçüncü qapıçı statusundadır.

Ən qəribəsi odur ki, əvəzində yerli statusu daşıyan, oyun praktikası olan Mehdi Cənnətovun adı isə siyahıda yoxdur.

Söhbət arxada qalan 2 turda qapısında qol görməyən, komandası lider olan qapıçıdan gedir.

Santuş açıqlamasında bu qərarını futbolçunun sənədində yaranmış problemlə əlaqədar olduğunu deyib.

Tutaq ki, Mehdi ilə bağlı aradan həlledilməz problem var. Açığı, inandırıcı gəlmir.

Bəs "Qəbələ"nin qapıçısı Səlahət Ağayevə nə söz?

Təcrübəli sima ilk iki turda meydanda olub. Qüsursuz oyunlar keçirib. Milli təcrübəsi də var. Belə birini qoyub, oyun praktikasından faktiki əziyyət çəkən adlara yığmanın qapılarını açmaq ədalətli seçim hesab edilə bilməz.

Bəli, kənardan qalanlar gəlib dağı dağ üstə qoyası deyil, aşağı-yuxarı nə olacaqsa olacaq. Amma ölkənin bir nömrəli komandasında anına uyğun doğru qərarların verilməsi mütləqdir.

XANOĞLAN / SPORTİNFO.AZ