Ukrayna millisinin sabiq baş məşqçisi Miron Markeviç komandanın DÇ-2026-nın seçmə mərhələsindəki perspektivlərini dəyərləndirib.
Sportinfo.az xəbər verir ki, təcrübəli mütəxəssisin fikrincə, Fransa və Azərbaycan milliləri ilə oyunöncəsi heyətlə bağlı problemlər var.
O, xüsusən də legionerlərin oyun praktikasının azlığını vurğulayıb:
“Legionerlərin az oyun təcrübəsi və avrokuboklarda o qədər də uğurlu çıxış etməməsi? Ümid edək ki, bu, millinin oyununa mane olmayacaq.
Hazırda yalnız İlya Zabarnı və Yeqor Yarmolyuk daimi oyun praktikasına malikdirlər. Sergey Rebrovun başağrısı var.
Amma istərdim ki, futbolçular xarakter göstərsinlər və ən azı iki oyundan birində qələbə qazansınlar. Belə çətin vaxtda öz həmvətənlərinə heç olmasa, bir qədər sevinc bəxş etsinlər”.
Markeviç yığmalarının qrupda ikinci yeri tutmalı olduğunu düşünür:
“Bütün neqativləri unudub dünya çempionatına vəsiqə uğrunda mübarizə aparmaq lazımdır. Mən elə bir ciddi problem görmürəm ki, qrupda ən azı ikinci yeri tutmaq mümkün olmasın”.
Sentyabrın 5-də Vrotslavda Fransanı qəbul edəcək Ukrayna yığması dörd gün sonra Bakıda Azərbaycan millisinin qonağı olacaq.
