Nəhayət, Rüfət Abdullazadənin yeni klubu məlum oldu.
Ötən mövsüm "Səbail" formasında diqqətləri üzərinə çəkməyi bacaran vinger ölkə xaricinə üz tutdu.
O, Xorvatiya təmsilçisi “Varajdin”də çıxış edəcək.
Əslində 24 yaşlı futbolçunun Azərbaycan Premyer Liqasında da ən azı 4 müştərisi vardı.
Ona görə əlavə xərcə düşmək istəyənləri də öz yerində.
Rüfət vətəndə qalıb, kifayət qədər yaxşı maaş qazana bilərdi.
Amma o pulu yox, karyerasını düşündü.
Bir yerli futbolçunun bu cür yanaşmasına yalnız sevinmək olar.
"Sumqayıt"ın yetirməsi kifayət qədər istedadlıdır.
Potensialı böyük uğurlar əldə etməsinə, yaxşı karyera qurmasına imkan verir.
Ümid edək ki, Mahir Emrelinin ardınca o da uzun müddət ölkə xaricində qalmağı, uğurlu çıxış etməyi bacaracaq.
İlk addımı da kifayət qədər uğurlu hesab oluna bilər.
Çünki Xorvatiya təmsilçisi sıradan bir klub deyil.
Kifayət qədər iddialıdır.
Son mövsümü Xorvatiya çempionatında 4-cü pillədə bitirən kollektiv Konfrans Liqasında iştirak edəcək.
Yəni legioner həyatı yaşamaq, ölkədən çıxmaq xatirinə getməyib.
İndi qalır özünü orada doğrultması.
XANOĞLAN / SPORTİNFO.AZ
