Azərbaycan Premyer Liqasında III tura yekun vurulub.
Sportinfo.az xəbər verir ki, bağlanış matçında “Sabah” və “Neftçi” komandaları üz-üzə gəliblər.
Həftəiçi UEFA Konfrans Liqasında rəqiblərinə məğlub olaraq avrokuboklarla vidalaşan Bakı təmsilçiləri “Bank Respublika Arena”da qarşılaşıblar.
Əliyar Ağayevin idarə etdiyi paytaxt derbisində hesabı meydan sahibləri açıblar. 43-cü dəqiqədə Boyan Letiç dəqiq zərbə ilə toru silkələyib.
Fasilədən dərhal sonra “status-kvo” bərpa olunub. 49-cu dəqiqədə “Sabah”ın müdafiəçisi Con İrasabal avtoqol müəllifi olub.
Qalan dəqiqələrdə komandaların cəhdləri bir nəticə verməyincə, görüş 1:1 hesabı ilə başa çatıb. Yalnız “Sabah”ın baş məşqçisi Murad Musayev son dəqiqələrdə qırmızı vərəqə almaqla diqqət çəkib.
Bu nəticədən sonra “Sabah” xallarının sayını 4-ə, “Neftçi” isə 2-yə yüksəldib.
