.jpg)
Azərbaycanın 21 yaşadək futbolçulardan ibarət millisinin sabiq qapıçısı Oleq Karnaux "Sabah"dan İdman Arbitraj Məhkəməsinə (CAS) şikayət edib.
Ukrayna əsilli qolkiper Masazır klubu ilə 2019-cu ilin iyulunda 3 illik müqavilə bağlasa da, 1 ildən sonra buradan göndərilib.
Hazırda Ukraynada "Yarud"un (Mariupol) formasını geyinən kiper paytaxt təmsilçisinin heyətində heç vaxt meydana çıxmayıb.
"Sabah"ın mətbuat katibi Elnur Həmidov Sportinfo.az-a açıqlamasında məsələnin mahiyyəti barədə bunları deyib:
"Oleq Karnauxun müqaviləsinə vaxtından əvvəl xitam verilməsiylə bağlı narazılığı var idi. Bununla bağlı FİFA-ya müraciət etmişdi.
FİFA bu məsələdə klubun mövqeyinin haqlı olması barədə qərar verdi. Bundan bir müddət sonra futbolçu CAS-a müraciət etdi. Aprelin 23-də məsələ ilə bağlı məhkəmə oldu.
CAS bu cür qərarları dərhal qəbul etmir. Bəzən araşdırma bir neçə ay davam edə bilər. Çox güman, yaxın vaxtlarda məsələylə bağlı yekun qərar veriləcək.
