“Karvan Yevlax”ı “Qarabağ”la oyuna baş məşqçi qismində Füzuli Məmmədov çıxaracaq.
Hər halda, mətbuatda yayılan xəbərlərdə belə deyilir.
Bildirilir ki, ötən həftə “Kəpəz”ə 1:2 hesablı yenilgidən sonra baş məşqçi Azər Həşimov istefaya göndərilib. Onun yerinə isə Məmmədov təyin olunub.
Bu barədə informasiya yayılsa da, Yevlax təmsilçisi rəsmi mövqeyini bildirməyib. Hətta Peşəkar Futbol Liqasının rəsmi səhifəsində belə, baş məşqçi kimi Azər Həşimov göstərilib.
Belədirsə, klub niyə dəyişikliklə bağlı məlumat vermir?
Digər sual. Həşimovla ayrılıq razılığı əldə olunub, yoxsa o da Samir Abasov kimi təzminat tələb edir?
Sportinfo.az-a açıqlama verən 41 yaşlı mütəxəssis hazırkı vəziyyət barədə bunları deyib:
“Bəli, “Karvan Yevlax”dan ayrılmağım doğrudur. “Kəpəz”ə məğlubiyyətdən sonra klubdan zəng edib bildirdilər ki, rəhbərlik belə qərar qəbul edib.
Hörmətlə yanaşıram, bu, onların istəyidir. Lakin mənim “Karvan Yevlax”la müqaviləmin müddəti noyabr yox, may ayına qədərdir.
Rəsmi sənəddə bu cür qeyd olunub. İşimi davam etdirmək istəyirdim. Çünki komandanı Premyer Liqada saxlayacağımıza əmin idim”.
Aran təmsilçisi yayda baş məşqçi postuna təyin olunan A kateqoriyalı mütəxəssisin rəhbərliyi altında meydana çıxdığı 12 oyunda 5 xal toplayıb.
HƏBİB
.jpg)
