Mövsümün sonuncu turunun ən səs-küylü qarşılaşması “Neftçi Arena”da baş tutacaq.
“Neftçi” gümüş medallara sahib olaraq avrokuboklara vəsiqə qazanmaq yolunda “Sabah”ı qəbul edəcək.
Oyuna maraq gözləniləndən qat-qat artıqdır. Hər iki komandanın azarkeşləri, üstəgəl, sıravi futbolsevərlər prinsipial matçı canlı izləmək həvəsindədir.
“Ağ-qaralar”ın əsas gücü hesab olunan “Forza Neftçi” sosial şəbəkə vasitəsi ilə oyunla bağlı çağırış edib:
“Növbəti uğursuz mövsümün son qarşılaşmasında bizimlə birgə komandanı dəstəkləmək istəyənlər biletlərini 1A sektoruna alsın. Qara üst geyimlərindən və şərflərdən istifadə etməyiniz tələb olunur.
“Neftçi-2”yə çempionluq kubokunun təqdimatı mərasimi səbəbilə stadiona bir qədər tez gəlməyiniz tövsiyə olunur”.
Oyuna marağı və bilet satışındakı fəallığı nəzərə alsaq, stadionda azı 6-7 min azarkeşin olacağı ehtimal olunur.
Bu gün keçiriləcək “Neftçi” – “Sabah” görüşü saat 19:00-da başlayacaq.
HƏBİB / SPORTİNFO.AZ
