Yeni mövsümün transfer çalışmalarına start verən «Neftçi»nin bəzi planları üzə çıxmaqdadır.
Avrokuboklara vəsiqə uğrunda mübarizə aparan «ağ-qaralar» Şahruddin Məhəmmədəliyevdən sonra millinin daha bir üzvünün xidmətində maraqlıdır.
Paytaxt təmsilçisi «Adana Demirspor»un formasını geyinən qapıçıyla yanaşı, Mahir Emreliyə dəvət göndərib. «Neftçi» 27 yaşlı hücumçuya 2+1 illik təklif edib.
Emreli hazırda «Dinamo»ya məxsusdur. Onun Zaqreb təmsilçisi ilə müqaviləsi 2026-cı ilin yayınadək nəzərdə tutulub.
«Bakı»nın yetirməsinin bu ayın sonunda Xorvatiyadan ayrılması gözlənilir. Buna səbəb əsas heyətə düşməməsidir.
«Dinamo»nun Mahirə azad agent statusu vermək istəməsi məlumdur. Hələlik o naməlumdur ki, forvard təzminat almadan buranı tərk etməyə razılaşacaq, ya yox.
Yəqin ki, qarşıdakı həftələrdə bu sualın da cavabını biləcəyik. Bəlkə daha tez.
SPORTİNFO.AZ
