"Qarabağ"ın legioneri Yassin Benzia Fransanın Liqa 2 təmsilçilərindən təkliflər alıb.
Bu barədə Əlcəzair millisinin yarımmüdafiəçisi məlumat verib.
O, "Qarabağ"da xoşbəxt olduğunu və hələlik bu təkliflərə hazır olmadığını bildirib:
"Fransadan Liqa 2 klublarından təkliflərim oldu. Amma özümü o səviyyədə görmədim.
Mövsümü əla keçirirəm, xoşbəxtəm. Bu mövsüm 40-dan çox oyunda meydana çıxmışam.
Avropa Liqasında mübarizə aparmışam. Hazırda işlər istədiyimiz kimi davam edir".
Karyerasının ilk illəri Fransa ilə bağlı olmuş 29 yaşlı ərəb 2023-cü ilin yanvarından "Qarabağ"da çıxış edir. O, bu mövsüm Ağdam klubunda ümumilikdə 41 oyuna 13 qol vurub, 10 qol ötürməsi edib.
Redaksiyamıza daxil olan informasiyaya görə, Liqa 2 klublarından “Laval” və “Kan” Benziaya təklif göndərib.
Onlardan “Laval” Liqa 1-ə vəsiqə uğrunda mübarizə aparırsa, 30 tura 45 xal toplayan “Kan” turnir cədvəlinin 6-cı pilləsində qərarlaşıb.
SPORTİNFO.AZ